Foto: ashyq derekkóz
Qoǵamdyq qaýipsizdik pen qylmystyq qaterlerdi boljaý ortalyǵy men Bas prokýratýranyń Quqyqtyq statistika jáne arnaiy esep komiteti Google derekter bazasyn buzý faktisin anyqtaǵanyn habarlady. Bul jaǵdai 2,5 milliard Gmail qoldanýshysynyń derekteriniń qoldy bolýymen bailanysty, dep habarlaidy Ult.kz.
Resmi málimetke sáikes, uiymdastyrýshy retinde ShinyHunters hakerlik toby ataldy. Olar milliardtaǵan akkaýntqa qatysty bailanys derekterine qol jetkizgen. Degenmen, qupiia sózder tikelei urlanbaǵan.
Shabýyl áleýmettik injeneriia tásilimen jasalǵan. Alaiaqtar Google qyzmetkerin aldap, IT-jabdyqqa qol jetkizip, Salesforce Data Loader qosymshasyn zańsyz paidalanǵan. Osy derekterdiń negizinde qylmyskerler Google atynan habarlasyp, qoldanýshylardy qupiia sózdi qalpyna keltirýge itermelep, qupiia kodtar men akkaýnttarǵa qol jetkizýge tyrysqan.
Sarapshylardyń qaýipsizdik boiynsha keńesteri:
1️⃣ Qupiiasózdi dereý aýystyrý, qarapaiym jáne qaitalanatyn nusqalardan bas tartý.
2️⃣ Eki faktorly aýtentifikatsiiany qosý nemese zamanaýi qorǵaý ádisterin (biometriia, PIN) paidalaný.
3️⃣ Google atynan kelgen qońyraýlar men habarlamalarǵa senbeý — olardyń kópshiligi alaiaqtyq bolýy múmkin.
4️⃣ Qoldanbalar men qosylymdarǵa berilgen ruqsattardy tekserip, qajetsizderin óshirý.
Mamandardyń aitýynsha, tipti jartylai jariialanǵan derekterdiń ózi alaiaqtar úshin úlken qylmystyq shemalarǵa negiz bola alady. Sondyqtan qoldanýshylarǵa akkaýnttaryn únemi tekserip, qaýipsizdik sharalaryn ýaqytyly qabyldaý usynylady.
