Syrtqy ister ministri Muhtar Tileýberdi Gonkong qalasyna barǵysy keletin týristerge sál kidire turýdy surady, dep habarlaidy QazAqparat.
«Gonkong ortalyǵynda kólikterdiń júrýi tyǵyz bolyp jatyr. Sherý, politsiiamen qaqtyǵys– ýniversitet jaqtarynda. Jalpy, bizdiń Bas konsýldyǵymyz ornalasqan jer, basqa aýdandar tynysh» dedi Muhtar Tileýberdi Úkimet otyrysynan keiin tilshilerdiń suraǵyna jaýap bere otyryp.
Sonymen birge, ministr «qazaqstandyqtarǵa ol jaqqa týrist retinde barýǵa bola ma?» degen suraqqa da jaýap berdi.
«Týrister negizinen barady. Biraq, degenmen qazirgi jaǵdaiǵa bailanysty sál kidire tursa degen usynys bar» dedi ol.
Eske sala ketsek, Gonkong qalasynda narazylar men politsiia arasyndaǵy qaqtyǵys kezinde Qazaqstan azamaty ustalǵany habarlanǵan bolatyn.
«Gonkong qalasy politsiiasynyń qazaqstandyq diplomattarǵa usynǵan aqparatyna sáikes, 18 qarasha kúni narazylyq tanytýshylarmen qaqtyǵys barysynda Qazaqstan azamaty, Gonkong Baptist ýniversitetiniń birinshi kýrs stýdenti Núkpi Ábilqaiyr ustalǵan. Konsýl azamatymyzǵa bardy, onyń densaýlyq jai-kúii turaqty, oń qolynyń shyntaǵynda ustaý kezinde qulaǵat sátte alǵan azdaǵan jaraqaty bar. Ustalý jaǵdaiyna eshqandai shaǵymy joq» dep atap ótken edi ministrlikten.
Buǵan deiin Qazaqstannyń Gonkongtegi Bas konsýldyǵy Gonkongtegi (QHR) jaǵdaidyń shielenisýine jáne jappai narazylyq aktsiialarynyń jalǵasýyna bailanysty elimizdiń azamattaryna qalada qalyptasqan tótenshe jaǵdaidy eskerýdi ótingen bolatyn. Buǵan qosa QR Syrtqy ister ministrliginiń resmi ókili Aibek Smadiiarov sol jaqtaǵy qazaqstandyq stýdentterdi elge oralýǵa shaqyrǵan edi.
