Gonkongte "ulttyq qaýipsizdik týraly zańdy buzdy" dep kúdikke ilingen mediamagnat Djimmi Lai kepildik qaldyryp, qamaýdan bosap shyqty. Bul týraly South China Morning Post basylymy habarlady. Basylymnyń jazýynsha, sondai shartpen ózge de belsendiler bostandyqqa shyqqan.
Politsiia bólimshesiniń aldynda Laidy qaladaǵy demokratiialyq qozǵalys jaqtaýshylary qarsy alǵan.
Djimmi Lai jáne taǵy jeti adam (arasynda Laidyń eki uly jáne ol basqaratyn korporatsiiadaǵy top-menedjerler de bar) jaqynda qabyldanǵan ulttyq qaýipsizdik týraly zańdy buzdy degen kúdikke ilinip, qamalǵan edi.
Mediamagnat "ózge eldermen astyrtyn bailanysty, búlikke shaqyratyn sózder aitty jáne alaiaqtyq jasady" degen kúdikke ilinip otyr. Bul baptar boiynsha ómirlik túrme jazasy da qarastyrylǵan.
30 maýsym kúni Qytaidyń joǵarǵy zań shyǵarý organy Gonkongtegi "ulttyq qaýipsizdik zańyn" qabyldaǵan. Qaýipsizdik týraly zańǵa sáikes, Pekin satqyndyq, separatizm nemese terrorizm dep tapqan kez kelgen áreketti jasaǵan adam ómir boiyna bas bostandyǵynan aiyrylýy múmkin. Bul zań Gonkongtiń ózi ishinde jáne Batys elderi tarapynan qatań synǵa ushyraǵan. Olar zań Gonkongte saiasi qýǵyndy kúsheitedi, turǵyndardyń bostandyǵyn shekteidi dep sanaidy.
