Búgin, 3 sáýir kúni Astana qalalyq dene shynyqtyrý jáne sport basqarmasynyń jetekshisi Berik Marjyqbaev "Golovkin kelesi kezdesýin 17 shilde kúni Astanada ótkizedi" degen bolatyn. Tipti, bul jekpe-jekti ótkizý úshin ol qol qoiypty-mys. Osy oraida Vesti.kz portaly ne úshin Golovkinniń jekpe-jegi 17 shilde kúni ótpeitinin anyqtap kórgen.
Gennadii Golovkin kásipqoi boksta 37 kezdesý ótkizip, onyń barlyǵynda jeńiske jetken. 33 kezdesýde qarsylastaryn sulatyp salǵan. Qazirgi ýaqytta onyń enshisinde tórt uiymnyń chempiondyq belbeýi bar. Otandasymyz AQSh jerindegi birinshi kezdesýin 2012 jyldyń 1 qyrkúieginde ótkizgen.
2015 jyldan bastap ol muhittyń arǵy jaǵynda úlken ataqqa qol jetkizip, jekpe-jekteri aqyly júie(PPV satyly) boiynsha kórsetile bastady. Óziniń sońǵy kezdesýin ol 2017 jyldyń 18 naýryzda ótkizip, amerikalyq Deniel Djeikobsty tóreshilerdiń sheshimi boiynsha jeńgen edi.
Kásipqoi boksta buǵan deiin ótkizgen otandasymyzdyń jekpe-jekteri demalys kúnderi bolǵan. Golovkin karerasynda eshqashan dúisenbi kúni sharshy alańǵa shyqpaǵan. Al úlken kelisimsharttarǵa qol jetkizgennen bastap, onyń jekpe-jekteri tek demalys kúnderine qoiylyp júrdi. Bul boksshy úshin de, kórermen, telearna úshin de óte qolaily. Eń bastysy, qazir Golovkinniń HBO telearnasymen kelisimsharty bar. Keibir derekkózderdiń málimeti boiynsha, kelisimshart boiynsha qazaqstandyq boksshy tek demalys kúnderi jekpe-jek ótkizýi kerek eken.
Al, Marjyqbaev aitqan kún dúisenbige kelip otyr. Iaǵni, 17 shilde. Sondyqtan da Golovkinniń komandasy bul kúni jekpe-jek ótkizedi degenge úlken kúmánmen qaraýǵa bolady. Onyń ústine spiker jekpe-jek týraly tolyq eshqandai málimet taratpady.
Golovkinniń Astanadaǵy jekpe-jegi qashan ótetini belgisiz
