Qazaqstandyq boksshy Gennadii Golovkinniń komandasy promoýter Tom Lefflerdiń jattyǵýdy toqtatý týraly aitqan sózine pikir bildirdi, - dep habarlaidy Vesti.kz.
Munyń aldynda Leffler jattyǵý lagerin toqtata turý sebebi retinde Golovkinniń komandalasy qatysatyn boks keshine qatysýmen ǵana túsindirgen edi.
GGG-diń Qazaqstannan AQSh-qa reisi Máskeýde aialdady. Sportshy osy jaǵdaidy paidalanyp, Búkilálemdik boks sýperseriiasy (WBSS) finalyndaǵy Aleksandr Ýsikpen jekpe-jekke shyqqan Mýrat Gassievti qoldaýǵa barǵan. Golovkin dúisenbiden bastap Big Bear lagerindegi jattyǵýlaryna kirisip ketti.
"Gennadii Denis Tenniń qazasyn esti sala alǵashqy reispen Los-Andjelesten Almatyǵa ushyp ketti. Ol senbi tańǵysyn ushaqtan túsip, Denispen qoshtasyp, ata-anasyn qoldaý úshin sol úige bardy.
Osy ýaqyt boiy solardyń qasynda boldy, basqa eshkimmen tildesken joq. Kópshilik "qoshtasý kezinde nege sóz almady?" dep suraǵan bolatyn. Ol kópshilik aldynda sóz sóileýge emes, Denistiń ata-anasyn qoldaýǵa kelgen. Osyndai mańyzdy jekpe-jek aldynda jattyǵýyn da sol úshin ǵana úzdi. Ol Denisti adam retinde jáne sportshy retinde de qatty syilaityn. Bul rasymen barlyǵymyz úshin aýyr qaza", - deidi Golovkinniń ókili Janar Óteshova.
Osyǵan deiin kásipqoi bokstan álem chempiony Gennadii Golovkin (38-0-1, 33 KO) jattyǵýyn úzýge týra kelýine bailanysty óz komandasymen birge Los-Andjeleske qaityp oralǵany habarlanǵan edi.
21 shildede Golovkin qazaqstandyq mánerlep syrǵanaýshy Denis Tendi aqtyq saparǵa shyǵaryp salý úshin Almatyǵa keldi.
Eske sala ketsek, qazaqstandyq mánerlep syrǵanaýshy, Sochi Olimpiadasynyń qola júldegeri Denis Ten 19 shilde kúni Almatyda avtokólik urylarynyń qolynan qaza tapty. Sportshy turaqta turǵan kóliginiń ainasyn urlamaq bolǵan qaskóilerdiń ústinen túsken. Arada janjal shyǵyp, saldarynan kúdiktiler Denis Tenge pyshaq suǵyp alady.
Sportshy 3 litr qan joǵaltqan. Dárigerler 2,5 saǵat boiy onyń ómiri úshin kúreskenmen, ajaldan arashalap qala almady. Denis Ten 17:30-da aýrýhanada jan tapsyrdy.
Atalǵan faktige qatysty qylmystyq is qozǵaldy. QR prezidenti Nursultan Nazarbaev bas prokýror men ishki ister ministrine istiń jiti jáne obektivti tergelýin qamtamasyz etýdi tapsyrdy.
20 shilde kúni tańerteń mánerlep syrǵanaýshynyń ólimine kúdikti Nuraly Qiiasov ustaldy. Ol Jambyl oblysynyń týmasy, 24 jasta. Sol kúni keshke ekinshi kúdikti Qyzylorda oblysynyń týmasy Arman Qudaibergenov ustaldy.
Al búgin Denis Tenniń ólimine qatysty tyń derekter shyqty. Almaty IID aqparatynsha, oqiǵany kózben kórgen adamdar tabylǵan. Betpe-bet kezdesý barysynda Nuraly Qiiasov Denis Tenge pyshaq suqqanyn moiyndady. Buǵan deiin Arman Qudaibergenov pyshaq jaraqatyn salǵanyn aitqan edi. Eki kúdikti de buryn zańdy buzǵan.
