QR Premer-Ministriniń orynbasary – Saýda jáne integratsiia ministri Baqyt Sultanov gigiena buiymdarynyń baǵasyna qatysty boljamyn aitty, dep habarlaidy QazAqparat.
Ortalyq kommýnikatsiialar qyzmetinde ótken brifingte jýrnalist ministrden: «Kei sarapshylar Qazaqstanda turmystyq himiia men gigiena buiymdarynyń qymbattap, jetistpeitinin aityp otyr. Osyndai tapshylyqqa tap kelip otyrmyz ba? Onyń aldyn alý úshin ne istelip jatyr?», - dep surady.
«Siz aityp otyrǵan saraptama zertteýleri túrli sipatta bolýy múmkin. Jalpy aitsaq, qazirgi tańda logistika ózgerip jatyr. Munyń tek azyq-túlik taýaryna ǵana emes, tutyný taýaryna da qatysy bar. Biraq gigena buiymdaryna bailanysty qandai da bir problema kórip turǵan joqpyz», - dedi Sultanov BAQ ókiliniń suraǵyna bergen jaýabynda.
Onyń aitýynsha, atalǵan taýardyń negizgi bóligi syrttan alynatyndyqtan, teńgerim saqtaý deitin másele joq kórinedi.
«Mysaly, qantqa qatysty jaǵdaida bizge ózimizdiń óndirýshilerdiń usynysy men importtyń arasynda teńgerim saqtaý kerek edi. Al gigiena zattary negizinen syrttan ákelinedi. Ol kanaldardy erte bastan qaita qaradyq, jetkizý geografiiasy ózgerip úlgergen. Bul jerde biz tapshylyqqa ákeletindei qandai da bir problema kórip otyrǵan joqpyz», - dedi Baqyt Sultanov.
