Orta salmaqta IBF jáne IBO tujyrymy boiynsha álem chempiony atanǵan qazaqstandyq boksshy Gennadii Golovkin (40-1-1, 35 KO) men ýkrainalyq Sergei Derevianchenkonyń (13-1, 10 KO) jekpe-jegi, ásirese kezdesýdiń nátijesi boks áleminde úlken pikirtalas týdyrdy.
Aita keteiik, Gennadii Golovkin 6 qazan kúni orta salmaqta IBF jáne IBO chempiondyq beldikterin sarapqa salyp, tóreshiler sheshimimen (114-113, 115-112, 115-112) jeńiske jetken bolatyn. Alaida qazaqstandyq boksshy jekpe-jekte ózine kóp soqqy ótkizip, burynǵydai qarsylasyn aiqyn basymdyqpen jeńe almaǵany anyq baiqaldy. Jalpy Golovkin sporttyq mansabynda eń qiyn jekpe-jek ótkizgenin moiyndady. Sondai-aq «GGG» Sergei Derevianchenko qurmetke laiyq qarsylas ekenin de aitty.
Burynǵydai aiqyn basymdyq joq
Boxingscene portalynyń sport tilshisi jáne kommentator Kori Erdman Golovkin-Derevianchenko jekpe-jeginen keiin qazaqstandyq boksshy aiqyn basymdyqpen jeńiske jete almady dep sanaidy.
Onyń pikirinshe, Gennadii Golovkin alǵashqy raýndtardan keiin basymdyq kórsete almai, ózine kóp soqqy darytyp aldy. Qazaqstandyq 12 raýndqa deiin bokstasqanymen, shabýyly jáne aýyr soqqylary burynǵy kezdesýlerine qaraǵanda edáýir azaiǵan.
«Árine, bul jerde qarsylastyń áleýeti de joǵary boldy. Golovkinniń birneshe jyl burynǵy fizikalyq jaǵdaiy jaqsyraq edi. Eger Derevianchenko Golovkinmen Deniel Djeikobs jáne Saýl Alvaresten buryn judyryqtassa, onyń eń myqty qarsylasy bolary anyq. Sebebi ol - orta salmaqtaǵy eń myqty boksshylardyń biri», - dedi Kori Erdman.
Jańa taktika shabýylǵa áser etti
Gennadii Golovkin jattyqtyrýshysy Djonaton Benks bul jekpe-jekte qorǵanysqa kóńil bólgenin aitady. Sondyqtan CompuBox (Computerized punches scoring system) statistikasynan «GGG» qarsylasqa baǵyttaǵan djeb (Jab) sany aitarlyqtai azaiǵanyn baiqai alamyz.
Salystyratyn bolsaq, Golovkin - «Kanelo» rematchynda qazaqstandyq boksshy qarsylasqa 547 djeb soqqysyn baǵyttaǵan bolatyn. Al Derevianchenkoǵa qarsy jekpe-jekte Golovkin 406 djeb baǵyttap, 107-sin dál tigizgen.
Jekpe-jektiń qazaqstandyq boksshyǵa aýyr tigeniniń bir sebebi - qarsylastyń ishke jáne basqa baǵyttaǵan aýyr soqqylarynyń kóptigi. Aýyr soqqy Golovkinniń fizikalyq kúshine jáne jyldamdyǵyna aitarlyqtai áser etti.
CompuBox statistikasy kórsetkendei, «GGG» 12 raýndta 314 aýyr soqqy baǵyttap, 136 soqqyny dál tigizdi. Al qarsylasy 472 aýyr soqqy baǵyttap, onyń 183-in daryta bilgen. Buǵan deiin Golovkin eshbir qarsylasynan ondai aýyr soqqylar almaǵan edi.
Golovkin qartaiǵandai kórindi...
Golovkin - Derevianchenko jekpe-jeginen keiin tanymal boksshylar beldesý týraly óz oilarymen bólisti.
«37 jasqa kelgen Golovkin qartaiǵandai kórindi. Ol alǵashqy raýndtarda jaqsy bokstasqanymen, Derevianchenko 5-raýndtan bastap kush ala bastady. Ásirese osy raýndta ol Golovkinniń ishine aýyr soqqy jasady. Osydan keiin GGG sharshap qaldy. Derevianchenko jeńiske jete almasa da tamasha óner kórsetti, endi onyń tabysy aitarlyqtai joǵarylaidy», - deidi 2013 jyly Golovkinnen jeńilgen aǵylshyn boksshysy Mettiý Maklin (35-6, 22KO).
Jeńil salmaqta WBC tujyrymy boiynsha álem chempiony Devin Haneidiń (23-0,15KO) aitýynsha, jekpe-jekte teń nátije tirkelý kerek edi.
«Golovkinniń jekpe-jegine kóńilim tolmady. Buǵan deiin ol Derevianchenkony jekpe-jektiń ekinshi jartysynda nokaýtqa jiberedi dep topshylaǵan edim. Meniń oiymsha, olar teń tústi. Ol endi Alvaresti jeńe almaidy», - dedi amerikalyq boksshy.
Aýyr salmaqtaǵy amerikalyq boksshy Djarrell Miller Derevianchenko jeńiske jetti dep sanaitynyn jasyrmady. Onyń pikirinshe, Golovkinge qaraǵanda qarsylasy kóbirek belsendi boldy.
«GGG» dáýiri aiaqtaldy ma?
Gennadii Golovkin 37 jasta. Boks sporty úshin jas mańyzdy ról atqaratyny belgili. Odan bólek, «GGG»-dyń kásipqoi mansabynda eń myqty qarsylastar sońǵy birneshe jylda paida boldy. Uzaq jyldar boiy orta salmaqta ustemdik etýi oǵan taktika jáne tájiribelik turǵydan ósýine kedergi keltirdi. Sol sebepti Deniel Djeikobs jáne Saýl Alvares onyń bokstasý mánerin, tipti kemshil tustaryn taba bildi.
Golovkin – Djeikobs kezdesýinde qazaqstandyq boksshy sporttyq mansabynda alǵash ret 12 raýnd bokstasty. Jekpe-jekte «GGG»-dyń osal tustary ashyla bastady.
Al meksikalyq Saýl Alvarespen bolǵan alǵashqy jekpe-jekte Golovkin óziniń joiqyn shabýylymen chempiondyq ataqtaryn sátti qorǵap qaldy. Alaida ekinshi kezdesýde jas boksshynyń taktikalyq jaqtan óskeni, al Golovkinniń bokstasý máneri ózgerissiz qalǵany baiqaldy. Soqqy jaǵynan alda bolsa da, Alvarestiń belsendiligi men utymdy taktikasy tóreshilerdiń sheshimine áser etken syńaily.
Úsh jekpe-jekte de Golovkin kóp soqqy ótkizip aldy. Jas faktory endi oǵan taktikalyq jaqtan ósýine mumkindik bermeidi.
Obektivti sebepterge bailanysty Golovkinniń sporttyq mansaby sońǵy kezeńderine kelip jetti. Sondyqtan, sarapshylardyń pikirinshe, oǵan Alvarespen úshinshi jekpe-jek ótkizýge qaraǵanda, Demetriýs Andrade (28-0,17KO) jáne Billi Djo Sonders (28-0,13KO) syndy chempiondardyń beldigin jeńip, boks tarihyndaǵy óz esimin altyn árippen jazyp ketkeni kóbirek tiimdi bolar edi.
Muhtar Qalimollauly
