© AP Photo/Martin Meissner
Germaniianyń munai-gaz óndirýshi Wintershall Dea kontserni Resei naryǵynan ketetinin málimdedi.
"Reseide biznesti jalǵastyrý aqylǵa qonymdy sharýa dep oilaimaimyz. Basqynshylyq - qundylyqtarymyzǵa sáikes kelmeidi. Ol Eýropa pen Resei yntymaqtastyǵyna selkeý túsirdi" - dedi kompaniianyń bas direktory Mario Meren.
Kontsern ókilderiniń aitýynsha, Resei úkimeti eldegi batys kompaniialarynyń qyzmetin shektegen. Sonyń saldarynan Wintershall Dea-niń Reseidegi aktivteri "is júzinde tonalǵan". Al odan kelgen shyǵyn 5 mlrd eýrodan asady.
Kóktemde Wintershall Dea basshylyǵy Resei basqynshylyǵyna qaramastan, Reseidegi aktivterin saqtap, "Gazprommen" yntymaqtastyqty jalǵastyrýǵa bekingen. Sebebi Resei naryǵynan tolyq ketse, kompaniia "milliardtaǵan shyǵynǵa ushyraidy" dep oilaǵan.
Alaida Wintershall Dea keiinirek daýǵa ilikti. Kontsern reseilik "Gazpromǵa" áskeri ushaqtaryna arnalǵan kondensat tasymaldady dep aiyptaldy. Munai-gaz kompaniiasy aiypty teristedi.
2022 jyldyń 24 aqpanynda Resei Ýkrainaǵa basyp kirdi. Sol kezden beri AQSh pen Eýropa elderi reseilik kompaniialarmen yntymaqtastyqqa tyiym salatyn nemese shekteitin sanktsiialardy turaqty túrde engizip keledi.
Basqynshylyqqa jaýap retinde sheteldik kompaniialardyń shamamen 42 paiyzy Resei naryǵynan ketetinin málimdegen. 40 paiyzy qazir jumys istep jatyr, qalǵany eldegi qyzmetin toqtatqan nemese shektegen.
