Germaniiada virýs juqtyrǵan Qazaqstan azamatynyń jaǵdaiy jaqsaryp, aýrýhanadan shyqqan. Qazir ol karantinde, nemis dárigerleriniń baqylaýynda. Al Vengriiada virýs juqtyrǵan qazaqstandyqtyń jaǵdaiy birqalypty. Bul týraly 24 naýryzda Qazaqstan aqparat jáne qoǵamdyq kelisim ministri Dáýren Abaev brifingte habarlady.
Budan bólek, Abaev Qazaqstanda dertke shaldyqqan 68 adamnyń 29-y virýsty shetelden juqtyryp kelgenin, 26 adam ushaqta, 13 adam Qazaqstanda juqtyrǵanyn aitty.
Ministrdiń sózinshe, Qazaqstanda virýs tabylǵan adamdardyń 80 paiyzynda simptom joq ne sál qyzýy kóterilgen.
Qazir Covid-19 dertimen Almatyda - 29 adam, Nur-Sultanda - 35 adam, Qaraǵandyda - 2 adam, Almaty oblysynda - 1, Aqtóbe oblysynda 1 adam emdelip jatyr. Nur-Sultanda bir naýqas jasandy apparatqa qosylǵan.
Aita keteiik, 16 naýryzda koronavirýsqa bailanysty Qazaqstanda tótenshe jaǵdai rejimi jariialanǵan bolatyn. Al 19 naýryzdan bastap Nur-Sultan men Almatyda karantin engizildi.
