Aldyn-ala nátijelerge sáikes Germaniia kantsleri Angela Merkeldiń konservatorlyq odaǵy 24 qyrkúiekte ótken parlament sailaýynda basym kópshiliktiń daýysyna ie boldy. Merkel hanym tórtinshi márte úkimet basqarmaqshy.
ARD men ZDF telearnalarynyń habarlaýynsha, Merkel arqa súieitin Hristian-demokratiialyq partiiasy men Bavariia Hristian-sotsialistik odaǵy qurǵan blok shamamen sailaýshylardyń 33,5 paiyzynyń daýysyn aldy. Ekzitpol nátijesine sáikes, Martin Shýlts basqaratyn Sotsial-demokratiialyq partiia 21 paiyz qoldaý ielendi. Bul - sotsial-demokrattar úshin ekinshi dúniejúzilik soǵystan bergi eń az kórsetkish. Ásire ońshyl, popýlist "Alternativa" (AfD) partiiasy 13 paiyz daýys jinap, úshinshi orynǵa shyqty. Liberal-demokrattar 10 paiyz, Jasyldar men Solshyldar partiiasy toǵyz paiyzdai daýys alyp, bes paiyzdyq mejeni eńsergendikten parlamentke ótti.
Merkel endi koalitsiialyq úkimet qurýǵa kirispekshi, bul protsess birneshe aiǵa sozylady. Sotsial-demokratiialyq partiia tóraǵasynyń orynbasary Manýela Shvezig kantsler Angela Merkeldiń partiiasymen odaqtan shyǵyp, oppozitsiiaǵa ainalatyndaryn habarlady. Sotsial-demokrattar basqa barlyq partiialar siiaqty úshinshi oryndaǵy ásire ońshyldarǵa da qarsy. Aldyn-ala sailaý nátijeleri túpkilikti túrde rastalatyn bolsa, Germaniianyń qazirgi kóshi-qon saiasatyna qarsy shyqqan popýlister birinshi ret parlamentke ótpekshi.
Shyǵys Germaniiada baqtashy otbasynda týyp-ósken Merkel de, Shýlts te elektoratty elge bir millionnan astam basym kópshiligi musylman bosqyn kelip jatqanda bas kótergen popýlist "Alternativa" partiiasynyń úgit-nasihatyna boi aldyrmaýǵa shaqyrdy. Germaniianyń sotsial-demokrat syrtqy ister ministri Zigmar Gabriel "Ekinshi dúniejúzilik soǵystan beri birinshi ret Germaniia parlamentinde naǵyz natsister depýtat bolyp otyratynyn" eskertti.
