Germaniiada qaza tapqan qazaqstandyq burynǵy sýdia Aigúl Sailybaevanyń týystary men qorǵaýshylary qylmystyq iske qatysty jańa málimetterdi jariialady, dep habarlaidy ult.kz.
Marqumnyń anasy Sholpan Batqalova men advokat Janna Orazbahovanyń aitýynsha, áielge qatysty asa aýyr zorlyq-zombylyq belgileri anyqtalǵan. Olardyń pikirinshe, qylmys onyń kúieýimen birge turǵan páterde jasalýy múmkin.
Qorǵaýshy taraptyń málimetinshe, tergeý barysynda páter men jertóleden mańyzdy aiǵaqtar tabylǵan. Advokattar bul derekter qylmystyń mán-jaiyn anyqtaýǵa kómektesýi múmkin dep esepteidi.
Sondai-aq jábirlenýshi tarap Aigúl Sailybaevanyń kúieýi men enesiniń qylmysqa qatysy bolýy múmkin degen boljamyn aitty. Alaida bul tujyrymdar ázirge sotpen dáleldenbegen.
Marqumnyń aǵasy Janat Sailybaev áieldiń denesi izdestirý jumystary barysynda tabylǵanyn aityp, keiin onyń jeke basy saraptama arqyly rastalǵanyn jetkizdi.
Eske salsaq, 2024 jyldyń maýsym aiynda Germaniiada turatyn qazaqstandyq Aigúl Sailybaevanyń joǵalyp ketkeni týraly habar taraǵan bolatyn. Keiin onyń denesi Benshaim qalasynyń mańynan tabyldy.
Adam óltirý faktisi boiynsha Germaniiada qylmystyq is qozǵaldy. Germaniia quqyq qorǵaý organdarynyń málimetinshe, marqumnyń enesi Natalia Dontsova kúdikti retinde tanylyp, oǵan halyqaralyq deńgeide izdeý jariialanǵan.
Qazaqstannyń quqyq qorǵaý organdary da is boiynsha tergeý júrgizip jatyr. Marqumnyń týystary kúdiktilerdiń jaýapqa tartylýyn talap etýde.
