QR Parlament Májilisiniń depýtaty Gennadii Shipovskih latyn álipbii óz tilin bilmeitin qazaqtarǵa qazaq tilin úirenýge keremet múmkindik ekenin aitty, dep habarlaidy "Ult aqparat" QazAqparat agenttigine silteme jasap.
«Elbasymyzdyń sáýirde shyqqan «Rýhani jańǵyrý» baǵdarlamasynda halqymyzdyń salt-dástúrin jańǵyrtatyndai úlken baǵyttar berildi. Onyń ishindegi eń úlken jumystyń biri - latyn álipbiine kóshý. Biz latyn álipbiine kóshpeimiz - oralamyz. Sebebi, ózderińiz biletindei, 1929 jyldan bastap 1940 jylǵa deiin biz latyn álipbiin paidalanyp keldik. Alaida belgili saiasi sebeptermen kirill qarpine aýystyq. Qoǵam osy talqylaýdyń aiasynda birikti. Álipbidiń ekinshi nusqasyn alǵashqysynan góri qoldaýshylardyń basym ekenin baqylap otyrmyz. Bári de birte-birte oryndalady. Sondyqtan, ortaq jumysty birlesip, jumyla sheshken ońai degen oidamyn», - deidi Parlament Májilisiniń depýtaty Astanada ótken «Jańa álipbi - jańǵyrý joly» taqyrybyndaǵy dóńgelek ústelde.
Gennadii Shipovskihtiń aitýynsha, toqsanynshy jyldardaǵy qiyn kezeńderde álipbidi aýystyrý jumysyn kópshilik oilai qoiǵan joq. Sebebi, dál sol kezde Qazaqstannyń aldynda zamannyń ózge de talaptary tur edi.
«Alaida 25 jyl ótken soń dál osy kezeńde álipbidi aýystyratyn ýaqyt keldi degenge kámil senemin. Ár adam Qazaqstanda qazaqtyń jerin basyp júrgennen keiin qazaq tilin bilýi kerek. Eshbir tildi shettetpeimiz. Qazaq bola tura qazaq tilinde sóilei almaityndar da barshylyq. Latyn álipbii óz tilin bilmeitin qazaqtarǵa qazaq tilin meńgerýde keremet múmkindik dep oilaimyn. Senat Tóraǵasy aityp ótkendei, bul turǵyda qoǵamnyń pikirin eskerýimiz kerek. Sebebi, aqyldasyp pishken ton kelte bolmaidy», - deidi Gennadii Shipovskih.
