Boxingnews24.com portalynyń tilshisi Allan Foks Gennadii Golovkinge qatysty material jariialady. Onda jýrnalist otandasymyzdyń esepshotynda qansha aqsha bar ekenin aitty, - dep habarlaidy Vesti.kz tilshisi.
Golovkin 2020 jyldyń jeltoqsanynan beri jekpe-jek ótkizbedi. Ol sońǵy ret Niý-Iork qalasynda polshalyq Kamil Sheremetamen qolǵap túiistirip, jeńiske jetti. Sodan soń qazaqstandyq boksshy biyl jeltoqsannyń sońynda orta salmaqta WBA Super belbeýiniń iegeri Riota Mýratamen kezdesýi kerek edi. Alaida Japoniiadaǵa karantindik sharalarǵa bailanysty bul jekpe-jek keiinge shegerildi.
"Biraz ýaqyttan beri kezdesý ótkizbegen Golovkin az bolsa da, tanymaldylyǵynan aiyryldy. Degenmen bul másele ony ýaiymdata ma, joq pa bilmeimin. Sebebi qazaqstandyq boksshy karerasyn aiaqtaýǵa jaqyn. Shynymdy aitsam, Gennadii endi eki kezdesý ótkizse, onyń ózi jaman emes. Celebrity Net Worth aqparaty boiynsha, Golovkinniń bailyǵy 30 millionǵa teń. Eger chempionnyń mundai bailyǵy bolmaǵanda, ol 12 ai boiy demalmai, baiaǵyda jekpe-jek ótkizer edi", - dep jazady avtor.
Aita keteiik, búgin tanymal promoýter Eddi Hirn Golovkin men Riota Mýrata arasyndaǵy aiqastyń qashan ótetinin aitty. Onyń málimdeýinshe, jekpe-jek naýryz nemese sáýir aiynda ótedi.
