5 qazanda AQSh-tyń Niý-Iork qalasynda qazaqstandyq kásipqoi boksshy Gennadii Golovkin (39-1-1, 35 KO) men ýkrainalyq Sergei Derevianchenko (13-1, 10 KO) arasyndaǵy jekpe-jek ótedi.
Áigili «Madison Square Garden» alańynda ótetin boks keshinde qarsylastar IBF nusqasy boiynsha ortasha salmaqtaǵy Álem chempiony titýlyna talasady.
Sondai-aq, atalmysh boks keshinde taǵy bir qazaqstandyq boksshy Áli Ahmedov (15-0, 11 KO) amerikalyq Endriý Ernandeske (20-7-2, 7 KO) qarsy qolǵap túiistiredi.
«Qazaqstan» RTRK» AQ boks keshiniń barlyq kezdesýlerin kórsetý quqyǵyna ie boldy. Jekpe-jekterdi «Qazaqstan» jáne «Qazsport» arnalary tikelei efirde usynady. Transliatsiia Nur-Sultan ýaqyty boiynsha 6 qazan kúni 05:00-den bastalady.
Sonymen qatar, teleradiokorporatsiia qazaqstandyq kórermenderge kezdesýlerdi qazaqstan.tv jáne qazsporttv.kz caittary arqyly, QAZAQSTAN TV mobildi qosymshasy onlain tamashalaý múmkindigin usynyp otyr.
Bul kezdesý Gennadii Golovkinniń DAZN strimingtik servisimen jasasqan kelisimshart boiynsha ekinshi jekpe-jegi. Alǵashqy kezdesýde ol kanadalyq Stiv Rollsty nokaýtpen jeńgen bolatyn.
