Boksshy Gennadii Golovkin qazaqstandyqtardy Naýryz meiramymen quttyqtady, dep habarlaidy "Ult aqparat".
«Naýryz meiramy qutty bolsyn!! Densaýlyq, amandyq tileimin!! Aq mol bolsyn!! Ýaiym-qaiǵy joq bolsyn!», - dep jazdy qazaq tilinde boksshy Instagram-daǵy paraqshasynda.
Sondai-aq Golovkin bul postqa óziniń shapan kiip túsken fotosyn qosa salǵan. Sýrette qazaq jáne orys tilderinde «Dástúr. Búgin. Árqashan» dep jazylǵan.
Aita keteiik, G.Golovkin biylǵy mamyr aiynda jekpe-jek ótkizetini josparlanǵan. Áýelde onyń qarsylasy retinde meksikalyq boksshy Haime Mýngiia (36-0, 29 KO) aitylǵan edi. Alaida, naýryz aiynyń ortasynda H.Mýngiianyń promoýteri Fernando Beltran qazaqstandyq Gennadii Golovkin (41-1-1, 36 KO) ázirge óz klientimen kúreskisi kelmeitinin málim etti.
Beltrannyń aitýynsha, Golovkin WBA Super nusqasy boiynsha orta salmaqtaǵy álem chempiony – japon boksshysy Riota Mýrataǵa (16-2, 13 KO) qarsy jekpe-jek ótkizýdi josparlap otyr. «Golovkin japon boksshysyn qarsylasy etip tańdady. Ol – chempion, sondyqtan bunyń da róli zor. Onyń tańdaýyn qurmetteimin», – dedi Beltran.
Riota Mýrata WBA Super nusqasy boiynsha orta salmaqta álem chempiony bolsa, Golovkin – IBF jáne IBO belbeýleriniń iegeri. Sonymen qatar, osy jyldyń qyrkúieginde ótýi múmkin Gennadii Golovkin - Saýl «Kanelo» Alvares trilogiiasy týraly áńgime basylar emes.
