Májilis tóraǵasy Nurlan Nyǵmatýlin Qorǵanys ministrliginiń jumysyn synǵa aldy, dep habarlaidy Sputnik Qazaqstan.
Búgin Májilistiń jalpy otyrysynda "Qazaqstan Respýblikasynyń keibir zańnamalyq aktilerine jumyldyrý daiyndyǵy men jumyldyrý máseleleri boiynsha ózgerister men tolyqtyrýlar engizý týraly" zań jobasy birinshi oqylymda qaraldy.
Suraq-jaýap barysynda depýtat Asylbek Smaǵulov Qorǵanys ministrliginiń ókilinen soǵys ýaqyty jaǵdaiynda kásiporyndar men uiymdardan, azamattardan alynatyn avtokólik úshin aqy qalai tólenetinin surady. Májilismen qaralyp otyrǵan zań jobasynan bul normany kóre almaǵan.
Qorǵanys ministriniń birinshi orynbasary – Qarýly kúshter bas shtabynyń bastyǵy Murat Bektanov kólik mindetteriniń erejeleri ázirge jazylmaǵanyn, alaida zań jobasy aiasynda ázirlenetinin atap ótti.
Bul jaýapqa kóńili tolmaǵan Májilis spikeri odan Qorǵanys ministrliginiń buǵan qatysty pozitsiiasyn surady.
"Qazaqstandaǵy barlyq kólik bizdiń qujatta bar. Mobilizatsiia josparyna sáikes, biz áskeri qajettilik úshin olardy memleket menshigine alamyz", - dedi Bektanov.
Osy oraida zań jobasy týraly baiandama jasaǵan Ulttyq ekonomika ministri Rýslan Dálenov Bektanovtyń jaýabyn tolyqtyrdy. Aitýynsha, kólikterge qatysty ereje 2005 jyldan beri bar.
"Áskeri jaǵdai kezinde tek kólikter ǵana alynady. Kólik ielerine ótemaqy, jeke tulǵa bolsyn, zańdy tulǵa bolsyn, 60 kún ishinde tolyq mólsherde tólenedi. Zań jobasynda naqty tetik pen quzyret bekitilgen, qazir qorǵanys ministrligimen birlesip ázirlep jatyrmyz", - dedi Dálenov.
Nurlan Nyǵmatýlin qoiylǵan suraqqa durys jaýap bere almaǵan Qorǵanys ministriniń orynbasaryna shúilikti.
"Qorǵanys ministrligi múlde túk bilmeidi, sizderdegi tártipsizdiktiń bári osydan shyǵady. Pozitsiia baiaǵydan belgili, bul qoldanystaǵy erejeler, qazir tek zańmen rásimdeledi. Murat Káribaiuly, muny bilý kerek qoi. Siz bildei bastyqsyz. Ony bilmeseńiz, erteń sizdiń qol astyńyzda istegen ofitser qaidan biledi?", - dep ashýlandy spiker.
Aita ketsek, zań jobasynda mobilizatsiia rezerviniń dárilik zattary men meditsinalyq maqsattaǵy buiymdaryn jetkizý, saqtaý jáne jańartý jónindegi fýnktsiialardy Densaýlyq saqtaý ministrligine berý usynylyp otyr.
Qujatta mobilizatsiia daiyndyǵy salasyndaǵy ýákiletti organǵa qarý-jaraq pen áskeri tehnika buiymdaryna, asa mańyzdy azamattyq ónimge arnalǵan tehnikalyq qujattamanyń, sondai-aq táýekeli joǵary obektilerge, halyqtyń tynys-tirshiligin qamtamasyz etý júielerine jáne ulttyq igilik bolyp tabylatyn obektilerge arnalǵan jobalaý qujattamasynyń saqtandyrý qoryn qurý jáne saqtaý salasyndaǵy qyzmetti úilestirý jónindegi quzyretti beretin normalar bekitiledi.
Májilis depýtattary atalǵan zań jobasyn birinshi oqylymda maquldady.
