Almatydaǵy Baýyrjan Momyshuly atyndaǵy «Jas ulan» áskeri mektebiniń direktory men onyń eki orynbasary jumystan shyǵaryldy. Bul týraly qorǵanys ministrligi Tengrinews.kz aqparat agenttigine habarlady.
Buǵan deiin jelide Hummer jáne birneshe Gelandewagen kóliginen turatyn kortejdiń videosy taraǵan. Kortejde «Jas ulan» mektebiniń formasyn kigen túlekter kóńil kóterip, ketip bara jatqan. Internet qoldanýshylary «bolashaq ofitserlerdiń» bul áreketin synǵa alǵan.
Osy video taraǵan soń qorǵanys ministrligi áskeri bilim jáne kadr departamenti tekseris júrgizip, «mektepte tárbie jumystarynyń durys júrgizilmegenin anyqtaǵan».
Ministrliktiń habarlaýynsha, «Jas ulan» mektebiniń túlekterine Hummer jáne birneshe Gelandewagen kóligin ata-analary jaldaǵan.
Ministrlik oqýshylar bul qylyqtary úshin jazalanbaitynyn, ata-analardyń áreketi tekseriletinin habarlady. Al ata-analardyń biri kortej jaldaityndaryn balalaryna da, mektep basshylyǵyna da habarlamaǵanyn, tosyn syi jasamaq bolǵanyn aitqan.
Ministrlik oqýshylarǵa túsindirý jumystary júrgizilgenin málimdedi.
