Qazaqstanda taýarlyq gazdyń shekti kóterme saýda baǵalary bekitilgen, dep habarlaidy QR Energetika ministrliginiń baspasóz qyzmeti.
Baspasóz qyzmetiniń málimetterine qaraǵanda, 2019 jyldyń 1 qańtarynan bastap taýarlyq gazdyń shekti kóterme saýda baǵasy óńirge bailanysty 3,8-den 17,5%-ǵa deiin tómendetildi jáne osy ýaqytqa deiin kóterilgen joq.
Taýarlyq gazdyń shekti kóterme saýda baǵasy jer qoinaýyn paidalanýshylardan satyp alynatyn gaz baǵalarynan, gazdy tasymaldaý jáne gazdy jerasty qoimasynda saqtaý shyǵystarynan, sonymen qatar rentabeldilik normasynan turady.
Syǵymdalǵan jáne (nemese) suiytylǵan tabiǵi gaz óndirý úshin taýarlyq gazdy satyp alatyn ónerkásiptik tutynýshy-investorlarǵa taýarlyq gazdyń shekti baǵalary gazdyń ózindik qunynan turady.
Qazirgi ýaqytta ishki naryqta taýarlyq gazǵa bekitilgen shekti kóterme saýda baǵalary jetkiziletin gazdyń ózindik qunynan tómen ekendigin atap ótken jón. 2019 jylǵy 1 qańtardan bastap ministrlik taýarlyq gazdyń shekti kóterme saýda baǵalaryn óńirge bailanysty 3,8-den 17,5%-ǵa deiin tómendetti jáne osy ýaqytqa deiin kótergen joq.
Bekitilgen shekti kóterme saýda baǵalary gaz jáne gazben jabdyqtaý salasyndaǵy ulttyq operator «QazTransGaz» AQ úshin tiimsiz bolyp tabylady. 2015-2020 jyldar aralyǵynda Ulttyq operatordyń ishki naryqty sýbsidiialaý shyǵyndary shamamen 425 mlrd. teńgeni, onyń ishinde tek sońǵy eki jyl ishindegi (2019-2020jj.) shyǵyndar somasy 225,6 mlrd. teńgeni qurady. Osylaisha, taýarlyq gazdyń aǵymdaǵy baǵalaryn Ulttyq operator sýbsidiialaidy.
Osy májbúrli qoldaý sharasy gaz salasyn turaqty damytýdyń tejeýshi faktory bolyp otyr.
Respýblikany ishki gazben jabdyqtaý júzege asyrylatyn negizgi magistraldar keńes ýaqytynda salyndy, belgilengen resýrstaryn ótedi jáne óte tozǵan.
Ulttyq operatordyń aqparaty boiynsha, tek sońǵy bes jyl ishinde Qazaqstannyń gaz tasymaldaý júiesinde shamamen 67 myń aqaý anyqtalyp, búgingi kúni onyń tek 9 myńy joiyldy.
Atalǵan jaǵdai eldiń gaz tasymaldaý júiesin qalpyna keltirý jáne damytýǵa qajet tarifterdi ósirýge jol bermei ustap turý saldarynan qalyptasty. Bunyń nátijesinde aqaýlar sany ulǵaiyp, gaz tasymaldaý infraqurylymynyń apattylyq qaýpi joǵary bolyp otyr.
Osylaisha, gaz tarifterin ustap turý nemese tómendetý keleshekte elimizdegi túrli zalalǵa ákep soǵýy múmkin.
«Energetika ministrligi Qazaqstan Respýblikasynyń ishki naryǵynda taýarlyq gazdyń shekti kóterme saýda baǵalaryn, onyń ishinde taýarlyq gazdy syǵymdalǵan jáne (nemese) suiytylǵan tabiǵi gaz óndirý úshin satyp alatyn ónerkásiptik tutynýshy-investorlar úshin 2021 jylǵy 1 shildeden bastap 2022 jylǵy 30 maýsymdy qosa alǵan kezeńge arnalǵan shekti baǵalaryn bekitýdi josparlaidy. Joǵaryda jazylǵannyń negizinde, taýarlyq gazdyń shekti kóterme saýda baǵasyn 15%-ǵa deiin ulǵaitýdy kózdeitin buiryq jobasy daiyndaldy. Buiryq «Atameken» ulttyq palatasy men memlekettik organdarda jariia talqylanýda»,-delingen habarlamada.
