Avtor: Maitree Laipitaksin / depositphotos.com
Qazaqstanda gaz ballon jabdyǵy bar kólik ieleri kelesi jyldan bastap arnaiy belgi ornatýǵa mindetti, dep habarlaidy "Ult aqparat" Saýda jáne integratsiia ministrliginiń baspasóz qyzmetine silteme jasap.
"Qazaqstanda azamattardyń qaýipsizdigin qamtamasyz etetin standarttardy jaqsartý boiynsha belsendi jumys jalǵasyp jatyr.
Máselen, Saýda jáne integratsiia ministrliginiń Tehnikalyq retteý jáne metrologiia komiteti tóraǵasynyń 2023 jylǵy 24 qarashadaǵy buiryǵyna sáikes, QazStandart ázirlegen QR ST 1412-2017 «Jol qozǵalysyn retteýdiń tehnikalyq quraldary. Qoldaný qaǵidalary» ulttyq standartyna tolyqtyrýlar engizildi. Ózgerister 2024 jyldyń 1 qańtarynan bastap qoldanysqa engiziledi" - delingen habarlamada.
Bul standart mindetti norma bolyp tabylady, óitkeni ol Ishki ister ministriniń 2023 jylǵy 30 maýsymdaǵy № 534 buiryǵymen bekitilgen Jol qozǵalysy qaǵidalarynda silteme túrinde kórsetilgen.
«Gazǵa qaita jabdyqtaý únemi barlyq qaýipsizdik talaptaryn saqtai otyryp júrgizilmeidi. Ókinishke qarai, keide mundai kólik quraldary bizdiń azamattar úshin qaýipti bolýy múmkin. Osyǵan bailanysty gazǵa qaita jabdyqtalǵan kólik quraldarynyń jabyq turaqtarǵa kirýine tyiym salynady. Dál osyndai avtomobilderdi sáikestendirý jáne mundai tyiymdardy ákimshilendirý úshin arnaiy belgi engizildi», - dep atap ótti Tehnikalyq retteý jáne metrologiia komitetiniń tóraǵasy Qýanysh Elikbaev.
Ózgeris gaz ballondy jabdyǵy bar avtomobilderge arnaiy belgini mindetti túrde ornalastyrýdy kózdeidi. Ol qara tústi jiegi jáne «GAS» degen jazýy men lep belgisi bar sary tústi teńbúiirli úshburysh bolyp keledi. Bul belgi jabyq parkingterge kirgen kezde kólik ońai tanylatyndai etip ornatylýǵa tiis.
"Sonymen qatar jańa normalar gazben júretin kólikterdi jabyq turaq aimaqtarynda turaqqa qoiýdy tiimdi baqylaýǵa jáne tyiym salýǵa múmkindik beredi, bul saiyp kelgende azamattardyń jalpy qaýipsizdigine yqpal etedi" - delingen vedomstvo habarlamasynda.
