Foto: © AFP 2023 / MOHAMMED ABED
Gaza sektorynda Qazaqstannyń 76 azamaty bar. Bul týraly Syrtqy ister ministrliginiń resmi ókili Aibek Smadiiarov málimdedi, - dep habarlaidy Sputnik Qazaqstan.
"Bizdiń derekterimiz boiynsha Gaza sektorynda Qazaqstannyń 76 azamaty bar, otbasy múshelerimen qosa sanaǵanda 161 adam. Egipet tarapynan da, Izrail tarapynan da sheteldikterdiń otbasy múshelerimen shyǵýyna belgili bir talaptar qoiylady. Osyǵan bailanysty bizdiń azamattarymyz Qazaqstanǵa jaqyndaryn tastap ushyp shyǵýǵa daiyn emes", - dedi Smadiiarov apta saiynǵy brifingte.
Aitýynsha, Qazaqstan óz otandastaryn elge jetkizýge tolyǵymen daiyn.
"Azamattarymyz Mysyr shekarasyn kesip ótkennen keiin arnaiy bort Kair qalasyna ushyp shyǵady", - dedi SIM ókili.
Smadiiarovtyń aitýynsha, 4 qarashadan bastap Rafak pýnkti arqyly sheteldikter men jaralylardy evakýatsiialaý ýaqytsha toqtatylǵan.
Rafak – Egipet pen Gaza sektory shekarasyndaǵy baqylaý-ótkizý pýnkti.
Mysyr jáne Izrail talaptaryna sáikes ár elge Rafah pýnkti arqyly sheteldikterge ótýine belgili bir kún beriledi. Munda qazirgi ótkizý qabileti táýligine 500-ge jýyq adam, sondai-aq shamamen 45 eldiń elshilikteri usynǵan tizimdegi adamdardyń jalpy sany eskeriledi. Bul - shamamen 7 myń adam.
