Qazaqstannyń eńbek sińirgen ártisi Habiba Qaraqbaiqyzy Elebekova 100 jasynda dúnie saldy.
Elebekova Habiba Qaraqbaiqyzy, Qazaqstannyń eńbek sińirgen artisi, «Mádeniet úzdigi» tósbelgisiniń iegeri.
1916 j. Qaraǵandy oblysy Qarqaraly aýdany Tomar aýylynda dúniege kelgen.
1934-35 j j. Qarqaraly halyq teatrynda qyzmet istegen.
1935-37 j j. M. Áýezov atyndaǵy drama teatr janyndaǵy eki jyldyq stýdiiany bitirgen.
1935 j. beri M. Áýezov teatrynda úzilissiz qyzmet etedi. Sahnaǵa ulttyq teatrdyń irgetasyn qalaǵan, ataqty «samorodok sary altyn» býynynyń izin basa kelgen H. Elebekovany búgin de sol býynnyń sońǵy tuiaǵy deýge bolady.
Belgili aktrisa 1935 jylǵy alǵashqy qadamy – qazaqtyń alǵashqy kásibi teatr rejisseri J. Shaninniń ózi jazyp, ózi qoiǵan «Arqalyq batyr» tarihi dramasyndaǵy» Qarakózden bastap, qara shańyraq teatrda ulttyq qunary myqty kóptegen rol jasady.
Sahnadaǵy rolderi:
Ulttyq klassika men zamanaýi dramatýrgiiada: «Arqalyq batyr» tarihi dramasynda Qarakóz, M. Áýezovtiń «Qara qypshaq Qobylandysynda» Kúnikei, «Abaiynda» Qanykei, Uljan, B.Mailinniń «Maidanynda» Mamyq, Ǵ. Músirepovtiń «Qozy Kórpesh-Baian sulýynda» Maqpal, Sh. Qusaiynovtyń «Marabaiynda» Máriiash, «Amangeldide» Aqjan, Q. Amanjolovtyń «Dosymnyń úilenýinde» Aiǵanym, A. Tasymbekov pen Q.Ysqaqtyń «Kebenek kigen arýlarynda» Tutqyn, A. Súleimenovtiń «Jetinshi palatasynda» Kempir, Iran-Ǵaiyptyń» «Estaidyń Qorlanynda» Ainash t.b.
Álemdik dramatýrgiiada: G. Lorkanyń «Bernarda Albanyń úiinde» Ponsiia, Ostrovskiidiń «Naizaǵaiynda» Kezbe áiel, «Talanttar men tabynýshylarynda» D. Andreevna, Gogoldiń «Revizorynda» Poshlepkina, «Vetnam juldyzynda» Than, M. Meterlinktiń «Soqyrlarynda» Soqyr áiel t.b.
H. Elebekova biraz kórkem jáne derekti filmderge tústi. Olardyń ishinde áigili rejisser S. Qojyqovtyń «Eger bizdiń árqaisymyz…» (1961), sondai-aq, aktrisa túsken eń sońǵy film D. Joljaqsynovtyń «Birjan salyn» (2009) ataýǵa bolady.
H. Elebekova óziniń ómir-óner serigi J. Elebekov jáne HH ǵasyrdaǵy qazaq óneri týraly «Úni ketpes qulaqtan» (1981) kitabyn jazdy, bul eńbegi tolyqtyrylyp «Án-amanat» (1984) «Qairan, Júsekem» (1998) degen ataýlarmen qaita basyldy. Ulttyq óner tarihyn jaqsy biletin aktrisa biraz ánniń, mysaly, Abaidyń «Segiz aiaǵy», t.b. óz túpnusqasynda jetýine úlken eńbek sińirdi. Quimaqulaq deýge bolatyn Habiba apa kóp jyrlardy, mysaly, Maǵjan Jumabaevtyń jyrlaryn túgeldei derlik jatqa oqityn óneri bar.
Qazaqstannyń eńbek sińirgen artisi (1976), QR Mádeniet ministrliginiń «Mádeniet úzdigi» tósbelgisimen marapattaldy (2012).
«Habiba Elebekova» atty kitap (joba avtory Á. Bópejanova) «Áigili adamdar» seriiasymen «Óner» baspasynda jaryq kórdi (2012).
Marqummen qoshtasý qashan jáne qai kúni ótetini ázirge belgilenbegen.
