Seisenbi kúni Singapýrda AQSh Prezidenti Donald Tramp pen Soltústik Koreianyń kóshbasshysy Kim Chen Ynnyń tarihi kezdesýi ótti, dep habarlaidy QazAqparat Renhap agenttigine silteme jasap.
Sammit jergilikti ýaqyt boiynsha tańǵy 9-da Singapýrdegi Sentos aralyndaǵy Sapella qonaq úiinde bastaldy.
Álemdik jáne koreilik áleýmettik jelilerde tarihi sátti beineleitin sýretter men videolar paida boldy. KSNA soltústikoreialyq jańalyqtar agenttigi tańerteńnen bastap prezidentterdiń shaǵyn jáne keńeitilgen kezdesýiniń sýretteri jáne videolarymen bólisýde.
Renhap jazǵanyndai, shaǵyn kezdesý aldynda Tramp barlyǵy sátti ótetinine jáne aldaǵy ýaqytta eki memlekettiń ara-qatynasy jaqsy bolatynyna senimdilik bildirdi.
Tramp pen Kim kózbe-kóz 45 minýt sóilesip, keńeitilgen quramda bas kómekshileriniń qatysýymen ekijaqty kelissózderdi bastap ketti. Trampqa AQSh-tyń memlekettik hatshysy Maik Pompeo, Aq úidiń apparat basshysy Djon Kelli jáne prezidenttiń ulttyq qaýipsizdik jónindegi keńesshisi Djon Bolton qosyldy. Phenian tarapynan sammittiń aldynda AQSh-ta bolyp qaitqan Soltústik Koreia Eńbek partiiasy OK tóraǵasynyń orynbasary Kim Ion Chhol, Eńbek partiiasy OK tóraǵasynyń orynbasary Li Sý Ion, sondai-aq, Soltústik Koreia SIM basshysy Li Ion Ho qatysty.
Ońtústikkoreialyq basylymdardyń basty taqyrypqa arnalǵan maqalalarynda «taǵdyrsheshti kún», «ǵasyr kezdesýi», «beibitshilikke aparar alǵashqy qadam» syndy sóz tirkesteri kóptep jazylýda.
Renhap agenttiginiń aqparatyna sáikes, Donald Tramp Kim Chen Ynmen kezdesý taǵy bir kúnge sozylatynyn joqqa shyǵardy. Kútilgendei, búgin AQSh prezidenti soltústikkoreialyq tarappen ótken kezdesý jóninde baspasóz konferentsiiasyn berip, jergilikti ýaqyt boiynsha keshki saǵat 7-de AQSh-qa attanady.
