Astana qalasynyń Tilderdi damytý jáne arhiv isi basqarmasynyń uiymdastyrýymen QR Ulttyq akademiialyq kitaphanasynda Abai Qunanbaiulynyń shyǵarmashylyǵyna arnalǵan «Men jazbaimyn óleńdi ermek úshin» atty dóńgelek ústel otyrysy ótti, dep habarlaidy Astana qalasy ákimdiginiń resmi saity.
Atalǵan is-sharada Abaidyń 1888 jyly jazylǵan 27 shyǵarmasynyń (bul shyǵarmalarǵa biyl 130 jyl) tarihy aitylyp, tanymal óner adamdarynyń oryndaýynda ánderi shyrqaldy. Osy 27 óleńniń segizi aýdarma.
«Osy jyly jazǵan Abaidyń óleńderin biz 4 býynǵa bólip qaradyq. Abai «Kúlembaiǵa», «Bolys boldym mineki», «Ásetke», «Máz bolady bolysyń» siiaqty syn óleńderine 130 jyl tolady. Abai shyǵarmasynda birinshi Abaidyń synǵa, satiraǵa jazylǵan óleńderin aita almai júrmiz. Ekinshi álem ádebietin bizdiń ádebietke ákelýi, úshinshi ánderi, tórtinshi ǵashyqtyq jyrlarynyń býyn, stil erekshelikterin aita almaýdamyz», - dedi «Abaitaný» ǵylymi-tanymdyq ortalyǵynyń direktory, aqyn Almahan Muhamedqaliqyzy.
Keshtiń ashylýynda «Qazyǵurt» kinostýdiiasy túsirgen «Abai» filminen úzindi kórsetilip, Abaidyń «Segizaiaq» ániniń bir nusqasy tyńdaldy.
Dóńgelek ústel otyrysynda sóz alǵan filosofiia ǵylymynyń doktory, akademik Ǵarifolla Esim Abai óleńderiniń, ánderiniń qurylymyna, aqynnyń aitpaq oiyna keńinen toqtaldy.
«Abai týraly kózqaras kóp. Abai ózi «Segizaiaq» óleńinde aitqan. «Bilgenge - marjan, bilmeske - arzan, nadandar báhra ala almas» dep. Bilgen adamǵa Abai kerek, ol - marjan, bilmegenge kerek emes, ol - arzan. Abai ózi aitqan. «Itke marjan ne kerek?» dep. Abai ózine kúie jaqqyshtarǵa ózi jaýap bergen. Marjan oilardy aitý úshin ol adam mindetti túrde synshyl bolady. Sizderdiń satira dep otyrǵandaryńyz - synshyldyq. Abai - synshyl adam, ol ózinen bastap synaǵan. Halyqtyń minezi usaqtalyp ketti - Abai osy usaqtyqty synady. Halyqta kisilik qalmai bara jatqanyn synaǵan. Abaidyń satirasy bar qazaqtyń taǵdyryn qozǵaidy», - dedi Ǵarifolla Esim.
Akademiktiń aitýynsha, Abai poeziiaǵa, halyqtyń oilaý júiesine, synshyldyqqa, án ónerine reforma jasaǵan adam. Abaidyń ánderi bir álem.
Dóńgelek ústeldegi otyrysqa Abaitanýshy ǵalymdar men Abai ánderin oryndaýshy ánshiler, ziialy qaýym ókilderi, jalpy kórermen qaýym qatysty. Sonymen qatar, «Tatiananyń qyrdaǵy áni», «Aittym sálem Qalamqas» ánderi oryndaldy.
