«Oqýlyq» RǴPO men S.Demirel atyndaǵy ýniversitet birlesip, «Zamanaýi oqýlyq jáne bilim berý qundylyqtary» atty respýblikalyq ǵylymi konferentsiia ótkizdi.
Jiynda «Oqýlyq» ortalyǵynyń direktory Ǵani Beisembaev uiymnyń quzireti aiasynda qandai jumystar atqarylyp jatqanyn aityp berdi, dep habarlaidy QazAqparat.
«Keiingi jyldary bilim mazmunynyń, onyń ishinde oqýlyqtar mazmunynyń túbegeili ózgerýine bailanysty, qoǵam tarapynan syn da az bolmady. Tipti Prezidentimizdiń ózi bul máselege nazar aýdaryp, oqýlyq sapasyn jaqsartý kerektigin atady. Alash qairatkeri Ahmet Baitursynov aitpaqshy, «Oqý quralynyń eń ulyǵy – bala oqytatuǵyn kitap» bolsa, «Árkim ózi jaqsy biletin nársesin synaýy kerek» degen qaǵidasyna sai bolý, árine, erekshe jaýapkershilik júkteidi. Tiisinshe, ádildigin tikesinen aita júrip, sarapshy uiym retinde kemshilikterdi túzeýge bastaý – asa mańyzdy missiiamyz. Tipti biz onda álemdik órkeniet jetistikterimen sheber úilestire otyryp, mándi de mazmundy taqyryptardyń jazylyp, aishyqtalýyna kúsh salý kerektigin tereń uǵynamyz. Basqasy basqa, bir ǵana pýnkt – ziiandy sózderdiń enip ketpeýi máselesiniń ózi qandai kókeikesti. Bir sóz ia ósiredi, ia óshiredi. Býling, sýitsid degenniń túp tamyry sonda demeske laj joq. Oqýshylar oqý betterinen qanattanyp, durys baǵdar alyp, ómirge degen qulshynystary qairalyp shyǵýy kerek. Bul máseleler Ortalyqtyń da udaiy nazarynda», - dep atap ótti ol.
Ǵani Beisembaevtyń aitýynsha, bilim sapasy oqýlyq sapasyna tikelei bailanysty bolǵandyqtan, kelesi kezeńde aldyńǵy ketken olqylyqtardyń ornyn toltyrý mindeti tur. Bilim sapasyn baqylaý memlekettik bilim standarttarynan bastap oqýshylardyń bilim nátijelerin baǵalaýǵa deiin úzdiksiz algoritmge sai, júieli monitoring júrgizý, baǵalaý, taldaý, usynymdar berý túrinde júrgizilýi tiisti. Sonda ǵana naqty nátije bolmaq.
Sondai-aq, Ǵani Beisembaevtyń baiandaýyna qaraǵanda, osy maqsatta biyl bes baǵyttaǵy jumystar qolǵa alynǵan:
- birinshiden, oqýlyqtarǵa qatysty normativtik quqyqtyq aktilerge ózgerister engizilip, QR «Bilim týraly» Zańynyń jobasyna 4 baǵytta tolyqtyrýshy tujyrymdar usynyldy;
- ekinshiden, oqýlyqtardy saraptaýdyń Jańa júiesi ázirlenip, saraptaýdyń qupiialylyǵy men obektivtiligin kodtaý arqyly arttyrý boiynsha jumystar júrgizilgen. Mysaly, osyǵan orai tiisti bólim óz qyzmetin atqarýda. Budan bólek, ortalyqta arnaiy Psiholingvistikalyq jáne psihodidaktikalyq saraptamany ádisnamalyq qamtamasyz etý jáne Etnomádeni saraptamany ádisnamalyq qamtamasyz etý bólimderi ashylǵan;
- úshinshiden, syrtqy sarapshylar bazasyn qalyptastyrý men olardy sarapshylar quramyna iriktep alý talaptary aiqyndalǵan. Iaǵni, budan bylai kóptegen syndardan súrinbei ótken úzdikter ǵana sarapshylar bazasyna enedi.
- tórtinshiden, elektrondyq platformany engizý basymdyǵyna qozǵaý berildi. Dál bul baǵytqa artar úmit zor. Sebebi avtomattandyrý saraptama jumysynyń sapasy men ýaqyt faktorlaryna áser etip otyrǵan kóptegen qiyndyqtardyń túiinin sheshkeli otyr.
- besinshiden, ashyqtyq pen qoǵamdyq baqylaý jolǵa qoiyldy. Jýyrda ortalyqtyń janynan bilim berý salalary, biznes, bilik jáne azamattyq qoǵam qurylymdary arasynda turaqty dialog ornatýǵa jáne qoldaýǵa baǵyttalǵan arnaiy Ashyq qoǵamdyq-saraptamalyq platforma quryldy. Ol uiymnyń ashyqtyǵy men qoǵamdyq baqylaý, jurtshylyqpen bailanysty qamtamasyz etýge baǵdarlanǵan. Qoǵam belsendisi Murat Ábenov jetekshilik etetin bul topta Bibigúl Jeksenbai, Zeiin Álipbek, Irina Smirnova syndy azamattar bar.
Sondai-aq, quramyna kórnekti ǵalymdar, qoǵam qairatkerleri, ǵylymi ziialy qaýym ókilderi kiretin, bilim mazmunynyń sapasyn jaqsartýdyń ózekti máselelerin ǵylymi-ádisnamalyq turǵydan talqylaityn jáne usynystardy qabyldaýdy uiymdastyratyn, osy turǵyda ortalyq qyzmetiniń sapasynyń artýyna yqpal ete alatyn Ǵylymi-ádisnamalyq keńesi de jumys júrgizýde. Munda da Ǵarifolla Esim, Jaýymbai Qaraev, Faýziia Orazbaeva, Talas Omarov tárizdi moiyndalǵan ǵalymdar bar.
