Iýliia Galysheva Olimpiada oiyndarynyń irikteý kezeńin ekinshi ainalymnan bastaidy. Bul sheshimdi bapkerler keńesi qabyldady, dep habarlaidy Olympic.kz.
«Irikteýdiń birinshi kezeńine qatyspai, birden ekinshi ainalymnan bastaý týraly sheshimdi bapkerler qabyldady. Bul eshim halyqaralyq federatsiia reglamentine sai keledi ári Uiymdastyrý komitetimen kelisildi. Iýliia búgingi básekege qatysýǵa daiyn edi, alaida, PTR testtiń teris shyqqany týraly aqpar jarys bastalǵannan keiin belgili boldy. Bul ádettegidei jaǵdai emes. Búkil Beijiń Olimpiadasynyń uiymdastyrylýy da erekshe ekeni aitylyp jatyr. Barlyq qatysýshylar kún saiyn tapsyratyn PTR testte qarama-qaishylyq kóp jáne bul máselemen tutas delegatsiia da betpe-bet kelip otyr. Eń bastysy – Iýliia ózin jaqsy sezinýde jáne 6 aqpan kúngi básekege daiyn», - dedi UOK bas hatshysy Andrei Kriýkov.
Fristail-mogýldan komanda bas bapkeri Elena Krýglyhina jankúierlerge qoldaý kórsetkeni úshin alǵys aitty.
«Bul Olimpiada ne bolatynyn boljaý óte qiyn. Mine, bastalǵany búgin ǵana, al osyǵan deiin qanshama jaittar bastan ótýde. Biz úshin alań bolmańyzdar, sportshylarda bári jaqsy. Iýliia ózin jaqsy sezinýde, jumysty odan ári jalǵastyramyz. Barshańyzdan qoldaý kútemiz, bizge jankúier bolyńyzdar», - dedi bas bapker.
Eske sala keteiik, áielder arasyndaǵy ekinshi irikteý kezeń 6 aqpanda, erler arasyndaǵy doda 5 aqpanda ótedi. Finaldyq kezeńder de osy ýaqytqa josparlanǵan.
