Damyǵan elderde infliatsiia rekordtyq deńgeide saqtalyp otyr. Bul týraly búgin Úkimet otyrysynda Ulttyq bank tóraǵasy Ǵalymjan Pirmatov aitty, dep habarlaidy QazAqparat.
«Biylǵy mamyrda jahandyq naryqtarda qubylmalylyq saqtaldy. Álemdik ekonomika geosaiasi táýekelder men turaqty joǵary infliatsiia aiasynda boldy. Damyǵan elderdiń ortalyq bankteri infliatsiiamen tabandy kúresetinin jáne monetarlyq talaptardy birtindep qalpyna keltiretinin málimdedi. Álemde aqsha-kredit talaptary kúsheiip jatyr. Mamyrda AQSh Federaldyq rezerv júiesi mólsherlemeni 50 bazistik tarmaqqa kóterip, 1 maýsymnan bastap balansty qysqartý bastalǵanyn jariialady. Jyl sońyna deiin mólsherlemeniń taǵy 200 bazistik tarmaqqa 3 paiyzǵa deiin kóterilý múmkindigi bar. Biylǵy shildede Eýropa ortalyq banki 2011 jyldan beri alǵash ret mólsherlemeni birinshi bolyp kóterýi múmkin», - dedi Ulttyq bank tóraǵasy.
Onyń aitýynsha, uzaq merzimdi obligatsiialar kiristiliginiń jyldam ósýi jáne ekonomikasy damyǵan elderde, ásirese, AQSh-ta aqsha-kredit saiasatynyń barynsha jyldam kúsheitilýin kútý táýekeldi aktivterge azdap qysym kórsetedi. Máselen, mamyrda 2022 jyldyń basynan bastap damyǵan elderdiń aktsiialary 13,6 paiyzǵa tómendedi. AQSh-tyń 10 jyldyq memlekettik baǵaly qaǵazdarynyń kiristiligi 1,33 paiyzǵa ósti.
«14 maýsymdaǵy jaǵdai boiynsha damyǵan elderdiń aktsiialary jyldyń basynan bastap 21,3 paiyzǵa tómendedi. Bul Amerika Qurama Shtattarynda 40 jyldaǵy rekordtyq infliatsiiaǵa bailanysty AQSh-tyń Federaldy rezervtik júiesiniń aqsha-kredit saiasatyn neǵurlym tezirek qatańdatýyna alańdaýshylyq esebinen boldy. Damýshy elderdiń obligatsiialary boiynsha spred ulǵaiyp keledi. Resei Federatsiiasynyń Ýkrainamen qaqtyǵysynyń bastalýymen kúrt ósken jahandyq belgisizdik joǵary deńgeide qalyp otyr. Geosaiasi ahýal shielenisken jaǵdaida jahandyq ekonomikanyń ósý boljamdary tómendeý jaǵyna qarai qaita qaralady. Osyǵan bailanysty jahandyq iskerlik belsendiliktiń baiaýlaǵanyna qaramastan ósý aimaǵynda. Mamyrda Global Composite PMI, kóbinese, Qytaidaǵy karantinniń álsireýine jáne óndiris pen jańa tapsyrystardyń tez ósýine bailanysty 51,5-ke deiin azdap ósti. Óndiristik shyǵyndardyń quny men ónimniń baǵasy rekordtyq qarqynmen ósip keledi. Damyǵan elderde infliatsiia rekordtyq deńgeide saqtalyp otyr», - dedi Ǵalymjan Pirmatov.
