Mańǵystaý oblysyndaǵy qýańshylyq saldarynan 1 163 mal basy qyrylǵan. Bul týraly Mańǵystaý oblysy ákiminiń orynbasary Ǵalymjan Niiazov aitty, dep habarlaidy QazAqparat.
«Statistikalyq málimetke sáikes, osy jyldyń 1 tamyzdaǵy jaǵdai boiynsha oblysta 629 336 mal basy bar. Al aýyl sharýashylyǵyn birizdendirý bazasynda tirkelgen mal basy - 639 493. 77 myń tonna mal azyǵyn daiyndaý josparda boldy. Mańǵystaý, Beineý, Qaraqiia, Túpqaraǵan, Munaily aýdandaryna 41 470 tonna shóp ákelindi. Qys ailaryna 35 530 tonna shóp ákelýdi josparlap otyrmyz. 25 530 tonna kóp ózge oblystardan tasymaldanady. Al oblysymyzdyń aýmaǵynda 10 myń tonna shóp shabylady. Jyl ortasynda mal azyǵyna satyp alýǵa 204 mln teńge bólindi. Onyń ishinde 150 mln teńgesi basqa oblystardan shóp tasymaldaýǵa jumsaldy. Shóp 1 kelisi 55 teńgeden satyldy. Munan bólek jemge 54 mln teńge jumsaldy. Endi aldaǵy qys ailaryna Úkimet qoldaýymen mal azyǵyn alýǵa 5,3 mlrd teńge josparlanyp otyr. Qazirgi ýaqytta onyń 1,4 mlrd teńgesi bólindi. Jem satyp alýǵa bólingen qarajattyń somasy – 1 mlrd teńge. Qarjy aýdandarǵa mal basy sanyna qarai bólinedi», - dedi oblys ákiminiń orynbasary ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, qazirgi ýaqytta Aqmola, Qostanai, Soltústik Qazaqstan oblystarynan mal azyǵyn jetkizý baǵytynda jumys júrgizilip jatyr.
Bul rette «Qazaqstan temir joly» kompaniiasy jem-shóp tasymaldaý qyzmeti úshin Mańǵystaý oblysyna 75 paiyzdyq jeńildik berip otyr.
«Oblysymyzda bireýler 5 myń mal basy qyryldy dep júr. Sáýirde ár aýyldyń janynan biotermiialyq shuńqyr qazyp, 1 163 ólgen maldy kómdik. 1 163 maldyń tek 194-i ǵana tirkelgen. Qalǵan maldyń iesi joq, iesi kim ekendigi belgisiz. Mal ólimine qatysty 7 azamattan ǵana aryz tústi», - dedi Ǵalymjan Niiazov.
