Mýzykant Ǵalymjan Moldanazar Vlast basylymyna suhbat berip, óziniń ómiri, kózqarasy, mýzykasy jaily áńgimeledi. Týǵan jeri, týǵan tili týraly da aitty. Tómende suhbattan úzindiler berip otyrmyz.
***
Ózimdi Qazaqstan estradasynyń ókilimin dep sanamaimyn. Ne jasyratyny bar, bizdiń estrada maǵan unamaidy. Mádeniet, mýzyka, shyǵarmashylyq degen mundai kózqaras unamaidy. Fonogramma – degen ol qylmys. Jurtty aldap, aqsha alý… Bizdiń adamdar, kórermender ózderin uialmai, ashyqtan-ashyq aldap jatqanyn bilýi kerek. Al ártister ózderiniń jasap júrgenin qylmys ekenin túsinýleri kerek. Bul endi… jylaǵyń da, kúlgiń de keledi. Men qylmysker bolǵym kelmeidi.
***
Menen de myqtylar bar, biraq ázirge olar eshkimge kerek bolmai jatyr. Men baiaǵydan án shyǵaryp kelem, biraq ol ánder kereksiz bolyp Internette jatty. Sosyn Reseide bireýler «O, bir qazaq kúshti sinti-pop jasap júr» dedi. Sosyn bizdikiler «O! Bizdiń bala Eýropada birdeńe utyp aldy» dedi. Biraq men oǵan deiin de bolǵam negizi.
***
Reseige birneshe ret shaqyrdy. Biraq barǵym kelmedi. Óitkeni, Almatyny óte qatty jaqsy kórem. Bul jerden eshqaida ketkim kelmeidi.
***
Eshqashan ataqqa, kóp aqsha tabýǵa qyzyqqan emespin. Kóbi «Seniń ornyńda bolsam, basqa jaqqa ketip qalar edim» deidi. Men ketkim kelmeidi. Sońyna deiin osynda qalyp, osy qalada made in Kazakhstan deýge turarlyq birdeńe jasasam deimin.
***
Qazaq tili ol - men úshin dúniege alǵash kelgende estigen dybystarym. Men ony mektepti bitirgenshe tyńdadym. Óitkeni, bizdiń aýylda bir ǵana orys otbasy boldy, olardyń ózi oryssha bilmeitin.
***
Qairat Nurtasty óz basym syilaimyn. Onyń óz aýditoriiasy bar. Tipti sondai úlken aýditoriia mende de bolsa deimin. Qairatty súiip tyńdaityn, tyńdap otyryp jylaityn jaqyndarym bar. Ol shynymen de adamdarǵa bir sezimder beredi. Ol shynymen de adamdardy bir nárseler týraly oilandyrady.
***
Ákem qatal, áskeri adam. Biraq ishtei erkin adam. «Bilgenińdi iste. Eń bastysy, jurtty aldama» deidi.
***
Alty balanyń kishisi boldym. Qazaqta úidiń kishisi áke-sheshesimen qalady. Biraq ketetinimdi mektekte júrgende-aq bildim. Biraq týǵan aýylymdy qatty jaqsy kórem. Jii baram. Saǵynǵanda bilet alam da ketip qalam. Degenmen… bala kezimde, qazir de ol jermen birtúrli garmoniia taba almaimyn.
***
Aýyldyń tárbiesimen óstim. Sondyqtan kei nárselerdi qabyldaý maǵan qiyn. Mysaly, balanyń áke-sheshesimen daýlasqanyn kórgende «Ne bolyp barady ózi?» dep shoshimyn.
***
«Sen Amerikan mýzykasyn nasihattaisyń. MýzART, Qairat Nurtas – mine bular bizdiki» dep ursady keide. Men túsindirýge tyrysam: «MýzART pen Qairat Nurtas elektrondy gitaramen, sintezatormen aitady. Qazaq elektrondy gitara tartyp pa edi? Qalaisha ony naǵyz qazaq mýzykasy dep aitasyz?».
***
Qazaqsha bolsyn deitinder toilaryna Kane Ýest, Beionse, Djennifer Lopesterdi shaqyrady. Ol jerden dombyra, qobyz kórmeisiz.
***
«Nege dombyra tartpaisyń?» dep te ursady. Bir aǵamyzǵa «Mine kóshede kezdestik. Siz nege mersedespen keldińiz, nege atpen kelmedińiz?» dedim.
***
Birdeńe durys bolmai jatsa, bárin tastap qashýǵa bolmaidy. Árkim óz isin adal atqarsa, eldi syilasa, jáne adamdardy aqshasy úshin emes, adam bolǵany úshin syilasa, jaqsyraq bolady. Patriotizm degen osy.
***
Muny istep bireýler myrs etýileri múmkin. Biraq biz qatty bolyp kettik. Dostarymyzdyń ózine senbeimiz. Adam bolýdan qala bastaǵandaimyz.
***
Maikl Djekson naǵyz korol. Ony synap jatsa, óz basym birtúrli bola bastaimyn.
***
Toilarda án aitpaityn sebebim, toidyń shyrqyn buzǵym kelmeidi. «Keide bireý kelip «Ei inishek, osy seniń aityp júrgeniń ne án?» deidi. Bul da bir pikir. Ony da syilaǵan durys.
