Halyq jetkilikti deńgeide ekpe saldyrmasa, jaqyn arada Eýropaǵa COVID-19-dyń úshinshi tolqyny soqqy berýi jáne kúzde jańa shekteýler engizilýi múmkin. Bul týraly Robert Koh institýtynyń prezidenti, professor Lotar Viler málimdedi, - dep habarlaidy "Ult aqparat" RIA Novostige silteme jasap.
"Biz Eýropada saq bolýymyz kerek (COVID-19 úshinshi tolqynynyń bastalýynan – red.). Basqa elder týraly aitqym kelmeidi, bárimiz statistikany kóre alamyz. Germaniiaǵa kelsek, bizde úshinshi tolqyn bastalady. Oǵan naqty belgiler bar. Qoǵamdyq densaýlyq saqtaý sharalary, sonyń ishinde bailanysty azaitý jáne maska taǵý áli de mańyzdy", - dedi Viler sheteldik tilshiler qaýymdastyǵynyń baspasóz máslihatynda.
Onyń aitýynsha, memleketter bul sharalardy barynsha saqtaýy kerek, óitkeni bul sharalar myńdaǵan adamnyń ómirin saqtap qalýǵa kómektesti. Bul jaǵdaida jaýapkershilik adamdardyń ózderine júkteledi.
"Germaniiada úshinshi tolqyn bastalǵanyn kórip otyrmyn. Bul qatty alańdatady. Sondyqtan biz qysqa merzimde múmkindiginshe kóp adamdy vaktsinatsiialaýymyz kerek, áitpese aýyr naýqastar sanyn kóbeitip alamyz. Soń-soń kúresý de qiyndai túsedi", - dedi ol.
