Qazaqstan Respýblikasynyń Prezidenti Nursultan Nazarbaevtyń «Bolashaqqa baǵdar: rýhani jańǵyrý» tujyrymdamasy aqiqatty Alash jurtynyń aldyna jaiyp salǵan, Abaisha aitsaq, «Syldyrap óńkei kelisimnen» turatyn júrektiń kózi, tilektiń sózi. Aqqýdyń qanatynan án estirip, tulpardyń tuiaǵynan kúi tyńdaǵan qazaq degen qasietti jurttyń, Qazaqstan degen qasterli eldiń hany men qarashasynyń janynyń nury, kóńiliniń syry birge tolqyp jatsa sanamyzdyń sara dańǵylǵa túskeni. Bul bir búgingi urpaq temirqazyqtai kie tutyp, bolashaqqa baǵdar eter tujyrym tunǵan sóz.
«Jańǵyrý ataýly burynǵydai tarihi tájiribe men ulttyq dástúrlerge shekeden qaramaýǵa tiis. Kerisinshe, zaman syrynan súrinbei ótken ozyq dástúrlerdi tabysty jańǵyrýdyń alǵysharttaryna ainaldyra bilý qajet. Eger jańǵyrý eldiń ulttyq-rýhani tamyrynan nár ala almasa, ol adasýǵa bastaidy», delingen onda.
Ulttyq rýhani-tamyr... Baǵanaly báiterektiń butaǵyn jel shaiqap, daýyl terbetken talai. Zamanalar jeli, ǵasyrlar daýyly.
Sol tamyry tereń báiterek sonaý kóshpendiler órkenietinen aman jetip XXI ǵasyrdyń bastaýynan nár alyp kúnge qarap japyraǵyn jaiyp tur. Bul kezeń – jer-jahańda aqyl-oidyń alamanǵa túsken ýaqyty.
«Jańa turpatty jańǵyrýdyń eń basty sharty – sol ulttyq kodyńdy saqtai bilý. Onsyz jańǵyrý degenińiz qur jańǵyryqqa ainalýy op-ońai», delingen Elbasymyzdyń osy eńbeginde. Túitkildi shesher túiindi oi osy. Ulttyń bolmysyn, eldiń tutastyǵyn saqtaý – sizge de, bizge de syn. Shyndyq izdegen bop shyǵanǵa shyqpai, «Janym – arymnyń sadaǵasy» deitin qazaqi qaǵidanyń aýylynan alys qonbasaq qudai tileýimizdi berer.
Osy oi tolǵaýdyń úshinshi bóligi «Ulttyq biregeilikti saqtaý» dep atalypty. Onda: «Ulttyq salt-dástúrlerimiz, tilimiz ben mýzykamyz, ádebietimiz, joralǵylarymyz, bir sózben aitqanda ulttyq rýhymyz boiymyzda máńgi qalýǵa tiis», delingen.
Osy sanattaǵy «Qazaqstandaǵy 100 jańa esim» ideiasy, «Týǵan jer» baǵdarlamasy el men jerdiń erteńin oilaǵan arnaly tolǵanystardyń jemisi. Jaqsylyqtar men igilikter jariia bolýǵa tiis. Jaqsy adamdar, jomart júrekti jandar janymyzda júr. Búgingi kúnniń keiipkerlerin nasihattaý, búgingi kúnniń bútin sózin aitý – mindettiń úlkeni.
Jaqynda «Qazaqstan» telearnasynyń «Aitýǵa ońai» baǵdarlamasyna qonaq etip shaqyrdy. Týǵan jerine kómegi tigen azamattar jóninde habar eken. Solardyń ishinde meniń aýyldasym, sonaý Jańaarqanyń «Jeńis» aýylynan kelgen Qairat Kópbaev degen ini-baýyrymdy kórip, qýanyp qaldym. Jeke qojalyq iesi, jylqyshy Qairat aýylǵa sport keshenin salypty. Onyń quny 110 million teńge eken. Tusaýkeserin jasap, aýyl ákimine ótkizip beripti. «Odan saǵan túser ne paida bar?» – degen telejúrgizýshi suraǵyna: «Aýyldyń balalaryna kerek emes pe?» – dep kúlim qaǵady Qairat baýyrym. Mine, «Týǵan jer» ideiasynyń qoldaýshysy, mine, búgingi kúnniń keiipkeri.
«Gúlstan» jýrnalynyń redaktory, belgili kásipker Gózel Quljabaeva qaryndasymyzben kópten aralasyp turamyn. Óz aýyly «Basshi», «Nurym» degen eldi mekenderden birneshe baq ornatqan, gúlge bólegen. Qazaqstanda onyń kásibinen úlgi alyp júrgender de kóp. Armany – qazaqtyń jerin gúlge kómkerý, baqqa oraý.
Keshegi Buqar jyraý babamyz: «Bárińiz bir eneden týǵandai bolyńyz: jat janynan túńilsin, ainala almai at ólsin, aiyra almai jat ólsin», – dep beker ósiet aityp ketti deisiz be?
«Bolashaqqa baǵdar: rýhani jańǵyrý» sara da dara joldyń bastaýynda el Kóshbasshysynyń úkili úmiti, aialy armany.
«Kemedeginiń jany bir» deidi qazaq. Ulttyń kodyn saqtaý degen sóz – ultty saqtaý degen sóz. Eki dáýir men eki ǵasyr toǵysynda jańǵyrýdyń jańa baǵytyn Elbasy ózi usynyp otyr.
Meniń de, seniń de Otanyń – Qazaqstan, baýyrym! Odan basqa túgimiz de joq.
Barymyz da, baǵymyz da, baqytymyz da – Qazaqstan!
Bolashaqtyń baǵdary barshamyzdyń armanymyzdy aialasyn.
Ǵalym JAILYBAI,
aqyn, Qazaqstannyń eńbek sińirgen qairatkeri,
Qazaqstan Jazýshylar odaǵy Basqarma tóraǵasynyń birinshi orynbasary
