قازاقستان رەسپۋبليكاسىنىڭ پرەزيدەنتٸ نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» تۇجىرىمداماسى اقيقاتتى الاش جۇرتىنىڭ الدىنا جايىپ سالعان, ابايشا ايتساق, «سىلدىراپ ٶڭكەي كەلٸسٸمنەن» تۇراتىن جٷرەكتٸڭ كٶزٸ, تٸلەكتٸڭ سٶزٸ. اققۋدىڭ قاناتىنان ەن ەستٸرٸپ, تۇلپاردىڭ تۇياعىنان كٷي تىڭداعان قازاق دەگەن قاسيەتتٸ جۇرتتىڭ, قازاقستان دەگەن قاستەرلٸ ەلدٸڭ حانى مەن قاراشاسىنىڭ جانىنىڭ نۇرى, كٶڭٸلٸنٸڭ سىرى بٸرگە تولقىپ جاتسا سانامىزدىڭ سارا داڭعىلعا تٷسكەنٸ. بۇل بٸر بٷگٸنگٸ ۇرپاق تەمٸرقازىقتاي كيە تۇتىپ, بولاشاققا باعدار ەتەر تۇجىرىم تۇنعان سٶز.
«جاڭعىرۋ اتاۋلى بۇرىنعىداي تاريحي تەجٸريبە مەن ۇلتتىق دەستٷرلەرگە شەكەدەن قاراماۋعا تيٸس. كەرٸسٸنشە, زامان سىرىنان سٷرٸنبەي ٶتكەن وزىق دەستٷرلەردٸ تابىستى جاڭعىرۋدىڭ العىشارتتارىنا اينالدىرا بٸلۋ قاجەت. ەگەر جاڭعىرۋ ەلدٸڭ ۇلتتىق-رۋحاني تامىرىنان نەر الا الماسا, ول اداسۋعا باستايدى», دەلٸنگەن وندا.
ۇلتتىق رۋحاني-تامىر... باعانالى بەيتەرەكتٸڭ بۇتاعىن جەل شايقاپ, داۋىل تەربەتكەن تالاي. زامانالار جەلٸ, عاسىرلار داۋىلى.
سول تامىرى تەرەڭ بەيتەرەك سوناۋ كٶشپەندٸلەر ٶركەنيەتٸنەن امان جەتٸپ XXI عاسىردىڭ باستاۋىنان نەر الىپ كٷنگە قاراپ جاپىراعىن جايىپ تۇر. بۇل كەزەڭ – جەر-جاھاڭدا اقىل-ويدىڭ الامانعا تٷسكەن ۋاقىتى.
«جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي بٸلۋ. ونسىز جاڭعىرۋ دەگەنٸڭٸز قۇر جاڭعىرىققا اينالۋى وپ-وڭاي», دەلٸنگەن ەلباسىمىزدىڭ وسى ەڭبەگٸندە. تٷيتكٸلدٸ شەشەر تٷيٸندٸ وي وسى. ۇلتتىڭ بولمىسىن, ەلدٸڭ تۇتاستىعىن ساقتاۋ – سٸزگە دە, بٸزگە دە سىن. شىندىق ٸزدەگەن بوپ شىعانعا شىقپاي, «جانىم – ارىمنىڭ ساداعاسى» دەيتٸن قازاقي قاعيدانىڭ اۋىلىنان الىس قونباساق قۇداي تٸلەۋٸمٸزدٸ بەرەر.
وسى وي تولعاۋدىڭ ٷشٸنشٸ بٶلٸگٸ «ۇلتتىق بٸرەگەيلٸكتٸ ساقتاۋ» دەپ اتالىپتى. وندا: «ۇلتتىق سالت-دەستٷرلەرٸمٸز, تٸلٸمٸز بەن مۋزىكامىز, ەدەبيەتٸمٸز, جورالعىلارىمىز, بٸر سٶزبەن ايتقاندا ۇلتتىق رۋحىمىز بويىمىزدا مەڭگٸ قالۋعا تيٸس», دەلٸنگەن.
وسى ساناتتاعى «قازاقستانداعى 100 جاڭا ەسٸم» يدەياسى, «تۋعان جەر» باعدارلاماسى ەل مەن جەردٸڭ ەرتەڭٸن ويلاعان ارنالى تولعانىستاردىڭ جەمٸسٸ. جاقسىلىقتار مەن يگٸلٸكتەر جارييا بولۋعا تيٸس. جاقسى ادامدار, جومارت جٷرەكتٸ جاندار جانىمىزدا جٷر. بٷگٸنگٸ كٷننٸڭ كەيٸپكەرلەرٸن ناسيحاتتاۋ, بٷگٸنگٸ كٷننٸڭ بٷتٸن سٶزٸن ايتۋ – مٸندەتتٸڭ ٷلكەنٸ.
جاقىندا «قازاقستان» تەلەارناسىنىڭ «ايتۋعا وڭاي» باعدارلاماسىنا قوناق ەتٸپ شاقىردى. تۋعان جەرٸنە كٶمەگٸ تيگەن ازاماتتار جٶنٸندە حابار ەكەن. سولاردىڭ ٸشٸندە مەنٸڭ اۋىلداسىم, سوناۋ جاڭاارقانىڭ «جەڭٸس» اۋىلىنان كەلگەن قايرات كٶپباەۆ دەگەن ٸنٸ-باۋىرىمدى كٶرٸپ, قۋانىپ قالدىم. جەكە قوجالىق يەسٸ, جىلقىشى قايرات اۋىلعا سپورت كەشەنٸن سالىپتى. ونىڭ قۇنى 110 ميلليون تەڭگە ەكەن. تۇساۋكەسەرٸن جاساپ, اۋىل ەكٸمٸنە ٶتكٸزٸپ بەرٸپتٸ. «ودان ساعان تٷسەر نە پايدا بار?» – دەگەن تەلەجٷرگٸزۋشٸ سۇراعىنا: «اۋىلدىڭ بالالارىنا كەرەك ەمەس پە?» – دەپ كٷلٸم قاعادى قايرات باۋىرىم. مٸنە, «تۋعان جەر» يدەياسىنىڭ قولداۋشىسى, مٸنە, بٷگٸنگٸ كٷننٸڭ كەيٸپكەرٸ.
«گٷلستان» جۋرنالىنىڭ رەداكتورى, بەلگٸلٸ كەسٸپكەر گٶزەل قۇلجاباەۆا قارىنداسىمىزبەن كٶپتەن ارالاسىپ تۇرامىن. ٶز اۋىلى «باسشي», «نۇرىم» دەگەن ەلدٸ مەكەندەردەن بٸرنەشە باق ورناتقان, گٷلگە بٶلەگەن. قازاقستاندا ونىڭ كەسٸبٸنەن ٷلگٸ الىپ جٷرگەندەر دە كٶپ. ارمانى – قازاقتىڭ جەرٸن گٷلگە كٶمكەرۋ, باققا وراۋ.
كەشەگٸ بۇقار جىراۋ بابامىز: «بەرٸڭٸز بٸر ەنەدەن تۋعانداي بولىڭىز: جات جانىنان تٷڭٸلسٸن, اينالا الماي ات ٶلسٸن, ايىرا الماي جات ٶلسٸن», – دەپ بەكەر ٶسيەت ايتىپ كەتتٸ دەيسٸز بە?
«بولاشاققا باعدار: رۋحاني جاڭعىرۋ» سارا دا دارا جولدىڭ باستاۋىندا ەل كٶشباسشىسىنىڭ ٷكٸلٸ ٷمٸتٸ, ايالى ارمانى.
«كەمەدەگٸنٸڭ جانى بٸر» دەيدٸ قازاق. ۇلتتىڭ كودىن ساقتاۋ دەگەن سٶز – ۇلتتى ساقتاۋ دەگەن سٶز. ەكٸ دەۋٸر مەن ەكٸ عاسىر توعىسىندا جاڭعىرۋدىڭ جاڭا باعىتىن ەلباسى ٶزٸ ۇسىنىپ وتىر.
مەنٸڭ دە, سەنٸڭ دە وتانىڭ – قازاقستان, باۋىرىم! ودان باسقا تٷگٸمٸز دە جوق.
بارىمىز دا, باعىمىز دا, باقىتىمىز دا – قازاقستان!
بولاشاقتىڭ باعدارى بارشامىزدىڭ ارمانىمىزدى ايالاسىن.
عالىم جايلىباي,
اقىن, قازاقستاننىڭ ەڭبەك سٸڭٸرگەن قايراتكەرٸ,
قازاقستان جازۋشىلار وداعى باسقارما تٶراعاسىنىڭ بٸرٸنشٸ ورىنباسارى
