Jyldyń ishinde jyl kelgendei kútetin úkili kúnder bar.
Mundai kúnniń kóptigi – úmittiń zoraiyp, qýanyshtyń molaiǵany.
Jyl saiynǵy ádebiet pen óner salasyndaǵy memlekettik syilyq ielerin de tap osylai taǵatsyzdana tosasyń.
Chehovtyń áigili Kashtankasy qojaiyny: «Talant! Talant!» – dep úidi basyna kóterip, ekilene aiǵai salǵanda, it baiǵus ózin shaqyryp jatqan joq pa eken dep, jatqan ornynan atyp-atyp turǵan saiyn, aiaýshylyq sezimi oianady.
Áiteýir qur dúregeige bola, qutyń qashyp otyrmaǵany anyq...
Endeshe «júzden – júirik, myńnan – tulpar» shyqqan has talanttardyń esimin estigiń kelip, esiń ketse, nesi aiyp?!
Sarǵaiyp kútkeniń saǵymdai qol bulǵap alystai berse, úmit pen kúdik almasyp, ekiudai kúi keshedi ekensiń. Sóitsek, oilaǵany tez oryndala qoimaǵanǵa degbirsizdene qalatyn jazǵan basymyz onyń da syryn endi uǵyp jatyr: óner men ádebiet, mádeniet bar – barlyǵyna buryn-sońdy bar-joǵy eki-aq syilyq beriletin bolsa; bul joly kieli jetige kóteripti.
«Abai jylynda» bul da úlken qurmet. Keremet!
«Ádebiet pen óner uly bolmaǵan jerde ult ta uly bola almaidy», – dep artyna ósiet qaldyrǵan uly Ǵabeń, Ǵabit Músirepovtiń amanaty, obaly neshik, aýyzdan túspegenimen, aýyz úiden beri attap, tórge ótýi neǵaibyldaý bolyp júr edi.
«Táýbe, oryndala bastapty!» – degen shadyman qýanysh boiymyzdy kernep ketti.
Ádebiet pen óner salasyndaǵy memlekettik syilyqty taǵaiyndaý jónindegi komissiia múshelerinen estigenimiz, qorytyndy jinalysta Memlekettik hatshy Qyrymbek Kósherbaev jyldaǵy qalyptasqan daǵdyny buzyp, jeńimpazdardy atamapty.
Munysy nesi dep tań qalyp edik, jaýaby da keshiktirmedi: úmitkerlerdiń altaýy shartqa sai jetkilikti upai jinapty da, al jazýshy Tynymbai Nurmaǵambetov aǵamyzǵa bir ball jetpei qalypty.
Tóraǵalyq etýshi Qyrymbek Eleýulynyń únsiz ketýiniń bar syry osy eken.
«Keshegi Keńes úkimeti taramai, úi de, kúi de ornynda turǵan shaqtarda bul Jarqynbek qandai edi… Jarqyldap júrgeni-ai, qarqyldap kúlgeni-ai… Aýyl-aimaqqa sózi ótti, sózi ótpegen jerde ózi ótti… Alystan kelgender Jarqynbektiń úiine tústi. Et jep, araq ishti. Qondy. Jaqyn júrgender de Jarqynbekpen otyrystas bolýǵa asyq edi. Jarqynbek maqtasa mártebe kórip, kúldi. Jumsasa qýanyp júgirdi. Óziniń de baǵy tym erte janyp ketti me nemene…»
Qalamgerdiń atyshýly áńgimesiniń alǵashqy osy joldaryn oqyǵan saiyn, qainaǵan isten qaǵajý qalǵan qazaq azamatynyń músápir halin kórip, eriksiz qinalasyń.
«Minezi salmaqty, sabyrly-aq edi, endi jeńil qozǵalyp, asyǵys sóileitindi shyǵardy. Jeńil qozǵalaiyn da, asyǵys sóileiin de demeidi… áiteýir ózi de, sózi de óz-ózinen jeńildep ketkendei…»
Zaman kóshine ilese almaǵan ǵoi dep, osynyń bárin kiná qyp ózine artyp, ótken dáýir qoǵamyna jaba salar ediń; «Jylqy jylynda bir minilse – tulpar; aiynda bir minilse – at; kún saiyn minseń – esek»; eki qolyn aldyna syidyra almai, shaqshadai basy sharadai bolyp júrgen isker jigitterdiń qalyń shoǵyryn shyqqyr kóz kórmei júr me.
Jazýshy bul máseleni muqiiat zerdeleýdi talap etedi.
Bir demde oqyp shyqqanyńmen, sheshimi op-ońai aldyńnan júgirip shyǵa qoiar ma eken?!
Osyndai qazaq qoǵamyndaǵy jái kóz ańǵara bermeitin qaltarys-bultarysty dóp basatyn jazýshynyń shyn baǵasyn bilgen, qadirlegen Memlekettik hatshy Prezidentpen ońasha aqyldasqan syńaily.
Qasym-Jomart Kemeluly shyn máninde naǵyz kemeldik kórsetti.
Memleket basshysy óz sózin aitty – talant tuǵyrǵa kóterildi.
«Estitin memleket» baryn kórdik.
Qýanysh qutty bolsyn, aǵaiyn!
Dáýletkerei QUSAIYNOV,
jýrnalist, «QR mádeniet salasynyń úzdigi».
