Gaagadaǵy Halyqaralyq qylmystyq sot Resei prezidenti Vladimir Pýtindi tutqyndaýǵa order berdi. Bul habar sottyń resmi saitynda jaryq kórdi. Pýtinmen qosa, Reseidiń bala quqyqtary jónindegi ýákiletti ókili Mariia Lvova-Belovany da tutqyndaýǵa pármen berilgen, dep habarlaidy Azattyq.
Halyqaralyq qylmystyq sot ekeýin de Ýkrainanyń okkýpatsiialanǵan aimaǵynan halyqty, sonyń ishinde balalardy kúshtep kóshirip, áskeri qylmys jasady dep aiyptaǵan. Halyqaralyq quqyqta bul "genotsid" dep tanylýy múmkin.
Resei bul sottyń iýrisdiktsiiasyn moiyndamaidy. Máskeý 2016 jyldan beri sottyń áreketin anyqtaityn Rim statýtyna qatyspaidy. Al sot "áskeri qylmys jasady" dep aiyptalyp jatqan memleket basshylarynyń immýnitetin moiyndamaidy.
"Resei - Halyqaralyq qylmystyq sottyń Rim statýtynyń múshesi emes, ol boiynsha mindettemeleri joq. Resei - bul organmen áriptes emes, al Halyqaralyq qylmystyq sot berdi degen tutqyndaý týraly áldebir "retsepttiń" biz úshin quqyqtyq salmaǵy joq" - dedi Resei syrtqy ister ministriniń resmi ókili Mariia Zaharova.
Lvova-Belovanyń ózi Resei "balalardy maidan alańynda qaldyrmai, qamqor bolyp", "olarǵa jaqsy jaǵdai jasap jatqanyn" aitty. "Barlyq eldiń sanktsiiasy boldy, tipti Japoniia da maǵan sanktsiia saldy, endi tutqyndaýǵa order beripti, ári qarai ne beredi eken, kóreiik" - dedi ol Reseidiń RBK saityna.
Ýkrainanyń Bas prokýrory Andrei Kostin muny Ýkraina men jalpy halyqaralyq quqyq júiesi úshin tarihi sheshim dep atady. Onyń aitýynsha, Kiev Gaagadaǵy sotqa balalardy Reseige kúshtep kóshirý isi boiynsha 40 tom material tapsyrǵan.
Budan bir kún buryn ǵana Birikken Ulttar Uiymyna qarasty tergeý toby Reseidi "Ýkrainada keń aýqymda áskeri qylmys jasady, sonyń ishinde qasaqana adam óltirip, azaptady, kei kezderi jaqyndaryn balalarynyń kózinshe zorlap, máiitteriniń qasyna qamady" dep aiyptaǵan.
Kiev pen halyqaralyq quqyq qorǵaý uiymdary Máskeýdi soǵys aimaǵyndaǵy balalar úilerindegi ýkrain balalaryn ata-anasy, týystary bar bolsa da, Reseige kúshtep áketip, basqa otbasylarǵa berip jatyr dep aiyptap keledi.
Mamyr aiynda Resei mundai balalarǵa azamattyq berý úshin zańdaryn ózgertken. Máskeý "bul balalardy soǵystan qorǵap jatyrmyz" deidi. Human Rights Watch halyqaralyq quqyq qorǵaý uiymy soǵys kezinde balalardy asyrap alý halyqaralyq quqyq normalaryna qaishy ekenin málimdegen.
Halyqaralyq quqyqta is basyndaǵy memleket basshysyn tutqyndaý protsedýrasy rettelmegen. Budan buryn Halyqaralyq Qylmystyq sot 2008 jyly Sýdan prezidenti Omar ál-Bashirdi tutqyndaýǵa order bergen. Bilikten qulaǵan soń ony óz eliniń quqyq qorǵaý organdary tutqyndaǵan, biraq Halyqaralyq qylmystyq sotqa áli tapsyrmady.
