AQSh prezidenti Djo Baiden áieli Djill Baidenmen birge Ulybritaniianyń Kornýoll graftyǵynda ótip jatqan G7 sammitinde. 11 maýsym 2021 jyl.
Álemniń eń qýatty memleketteriniń basshylary kenje damyǵan elderdiń infraqurylymyn damytý josparyn usyndy. Bul Qytaidyń ózge elderge arnalǵan nesie saiasatyna balama bolmaq. Batys elderi Pekin osy nesieler arqyly ǵalamdyq yqpalyn arttyrýdy kózdeidi deidi.
Aldyńǵy qatarly jeti indýstriialyq memlekettiń (G7 nemese "Úlken jetilik") basshylary keiingi eki jyldai ýaqyttyń ishinde alǵash ret betpe-bet jinalyp otyr. Kún tártibinde vaktsinany bólisý, ádil ekonomika qurý sekildi máseleler tur.
Ulybritaniianyń Kornýoll graftyǵynda ótip jatqan sammit 11 maýsymda bastalǵan. Úlken jiynnyń ekinshi kúni AQSh prezidenti Djo Baiden Qytaidyń etnikalyq toptardyń quqyǵyn óreskel buzyp otyrǵanyn eske salyp, damyǵan demokratiialy elderdiń basshylaryn Pekinge birge tótep berýge úndedi.
12 maýsym kúni Baiden ákimshiliginde jumys isteitin eki shendi Kanada, Ulybritaniia jáne Frantsiia elderi Baidenniń Qytaiǵa birge tótep berý bastamasyn qoldap otyr dedi.
Germaniia, Italiia jáne Eýroodaq Pekinge ashyq qarsy shyǵýǵa eki oily bolyp otyr dedi Baiden ákimshiliginiń qyzmetkerleri baspasóz máslihatynda.
Aq úi qyzmetkerleriniń sózinshe, Baiden G7 liderlerin Qytaidaǵy musylman toptarǵa baǵyttalǵan májbúrli eńbekke qarsy ortaq úndeý jariialaýǵa shaqyryp otyr.
Sonymen qatar G7 elderi infraqurylymdy damytýǵa arnalǵan jospar usynýdy talqylady. Bul jospar Qytaidyń "Bir jol, bir beldeý" baǵdarlamasyna básekeles bolmaq. Batys basshylary Pekin osy baǵdarlamasy arqyly nesie alýshy memleketterdi ózine táýeldi etkisi keledi dep alańdaidy.
Baiden Eýropaǵa saparyn 16 maýsym kúni Resei prezidenti Vladimir Pýtinmen kezdeskennen keiin aiaqtaidy. Kezdesý Jeneva qalasynda ótpek.
