Búgin fýtzaldan álem chempionatynyń finaldyq satysy toptyq kezeńindegi ekinshi oiynynda Qazaqstan quramasy Litvamen kezdesti, dep habarlaidy QazAqparat.
Búgingi kezdesýdiń eki qurama úshin de mańyzy zor bolatyn. Jeńiske jetken jaǵdaida týrnir kestesindegi jaǵdaiyn jaqsartyp alatyn edi.
Kezdesý qazaqstandyq fýtzalshylar úshin sátti bastaldy. Oiynnyń nebári 24 sekýndynda Tainan esep ashyp ketti. Budan keiin qazaqstandyq qurama birneshe qaýipti shabýyl uiymdastyrdy. Dese de litvalyq oiynshylar oǵan laiyqty toitarys bere bildi.
Ekinshi kezeńde de qazaqstandyq fýtzalshylar basymdyǵyn arttyra tústi. Nátijesinde 30-minýtta Dáýren Tursaǵulov mergendik tanytsa, 35-minýtta Albert Aqbalyqov esepti ústemeledi.
Qazaqstan quramasy osylaisha qarsylasyn 3:0 esebimen jeńdi. Týrnir kestesinde alty upaimen kósh basyna shyqty.
Qazaqstandyq fýtzalshylar A tobynda synǵa túsedi. Qarsylastary - Litva, Venesýela, Kosta-Rika.
Alǵashqy kezdesýinde qazaqstandyq fýtzalshylar Kosta-Rikadan 6:1 esebimen basym tústi.
Qazaqstandyqtar endi úshinshi týrda 18 qyrkúiekte Venesýelamen sheberlik baiqasady. Atalǵan qurama búgin Kosta-Rikany 1:0 esebimen tize búktirdi.
Álem chempionatynyń finaly 3 qazanǵa belgilengen.
Qazaqstan quramasy budan buryn álem chempionaty finaldyq satysynda eki márte baq synady. 2000 jyly birinshi kezeńnen asa almasa, 2016 jyly 1/8 finalǵa deiin jetti.
