«Qazaqstan» RTRK» AQ basqarma tóraǵasy Kemelbek Oishybaev QR Aqparat jáne kommýnikatsiialar ministrliginen «Qazsport» telearnasy úshin fýtbol oiyndaryn kórsetýge arnalǵan jyljymaly televiziialyq stantsiia jetispeitindigin aityp, kómek surady, dep habarlaidy BNews.kz.
«Elimizdegi jalǵyz sport arnasy úshin óńirlerde ótetin fýtbol oiyndaryn kórsetý problema bolyp otyr. El birinshilikterin kórsetý úshin jyljymaly televiziialyq stantsiia jetispeidi. Mysaly, senbi-jeksenbi kúnderi ár oblysta fýtbol oiyndary ótedi. Almaty men Astanany 16 kameralyq JTS-tyń kómegimen sapaly kórsete alamyz. Al jergilikti jerlerde ótip jatqan matchtardy kórsetý qiyn. Bar-joǵy 4 kamera ǵana qoiamyz. Al, fýtbol kórsetý talaptaryna sáikes keminde 12 nemese 16 kamera qoldanylýy kerek. Máselen, aǵylshyn premer-ligasynyń oiyndarynda 32 kamera paidalanylady. Sondai-aq, qarasha aiynda Qyzylordada gandboldan ótetin Aziia chempionatyn «Qazsport» telearnasy kórsete almaidy. Sebebi dál sol ýaqytta Almaty men Astanada sharalar bar. Sondyqtan JTS jibere almaityn bolǵandyqtan, biz ony kórsetpeimiz dep josparlap otyrmyz. Óitkeni, gandboldy 4 kameramen kórsetsek, sapasy nashar bolady. «Qazsporttyń» kórsetilimin damytý úshin bizge JTS máselesin sheship berseńiz, úlken qoldaý bolar edi», – deidi K.Oishybaev.
Ministr otandyq fýtbolshylar aǵylshyn premer-ligasyndaǵydai qyzyqty oiyn kórsetse, 32 kamera alyp berýge daiyn ekenin aityp ázildedi.
«Qazsportqa» fýtbol oiyndaryn kórsetý úshin 16 kamera jetpeidi. 32 kamera qajet deseńiz, biz ony qoldaýǵa daiynbyz. Biraq, fýtbolshylarymyz Aǵylshyn premer-ligasy siiaqty oinasa ǵana», – dep ázildedi D.Abaev.
