Túrkistan qalasynda fýtboldan Qazaqstan sýperkýbogy úshin oiyndar bastaldy, dep habarlaidy "Ult aqparat".
Búgin birinshi jartylai finaldyq matchta alańǵa «Astana» men qaraǵandylyq «Shahter» komandalary shyqty.
Esepti 18-minýtta elordalyq komanda sapyndaǵy chernogoriialyq qorǵaýshy Jarko Tomashevich ashty.
Birinshi taim sońynda jaraqat alǵan «Shahterdiń» qaqpashysy Igor Shatskiidiń ornyna ekinshi kezeńde Timýrbek Zákirov shyqty. 73-minýtta T.Zákirov qaitarǵan dopqa armeniialyq shabýylshy Tigran Barsegian birinshi bolyp jetip, esepti 2:0-ge jetkizdi.
Osylaisha Andrei Tihonovtyń shákirtteri finalǵa shyqty. «Astananyń» finaldaǵy qarsylasy 3 naýryz kúni «Qairat» pen «Tobyldyń» arasynda ótetin oiynnan keiin anyqtalady. Jartylai finalda jeńilgen klýbtar 5 naýryzda úshinshi oryn úshin talasady. Finaldyq match 6 naýryzda josparlanǵan.
