Fýtboldan Qazaqstan kýbogynyń aldaǵy oiyndarynda VAR júiesi qoldanylady, dep habarlaidy QazAqparat.
Qazaqstan fýtbol federatsiiasy men Qazaqstan kásipqoi fýtbol ligasy osyǵan bailanysty FIFA-nyń resmi ruqsatyn aldy.
Qazirgi ýaqytta birqatar otandyq fýtbol tóreshisi, oqýdyń barlyq kezeńinen ótti. Atalǵan mamandar resmi oiyndarda VAR (video assistant referee) jáne AVAR (assistant VAR) retinde jumys isteý úshin FIFA-nyń qajetti litsenziiasyn aldy.
«Kelesi maýsymda Sýperkýbok, el birinshiligi jáne kýbok oiyndarynda qyzmet kórsetetin barlyq tóreshi úshin oqytý jáne litsenziialaý protsesi jalǵasýda.
Osy maýsymdaǵy Kýboktyń jartylai finaldyq jáne finaldyq oiyndary FIFA jáne IFAB bekitken VAR hattamasyna sáikes ótedi», - dep jazylǵan Qazaqstan kásipqoi fýtbol ligasy taratqan habarlamada.
Aita keteiik, jartylai finalda «Astana» men «Qairat», «Tobyl» men «Shahter» kezdesedi. Komandalar 1/2 final oiyndaryn 6 jáne 20 qarasha kúnderi ótkizedi.
Final 28 qarashaǵa belgilengen.
