Fýtboldan Premer-liga komandalary arasyndaǵy el birinshiliginiń on jetinshi týry máresine jetti, dep habarlaidy "Ult aqparat".
Keshe, 22 maýsymda atalǵan týrda elordada «Astana» Shymkenttiń «Ordabasy» klýbynan 0:2 esebimen jeńilse, odan keiin «Aqjaiyq» pen «Shahter», «Aqtóbe» men «Qyzyljar» 1:1 esebimen teń tústi.
Búgin, 23 maýsymda Taldyqorǵanda «Jetisý» men «Atyraý» komandalary kezdesti. Oiyn barysynda atyraýlyq klýb sapynan Petr Gjelchak 63-minýtta esep ashsa, 75-minýtta taldyqorǵandyq Artem Dmitriev tarazy basyn teńestirdi. Jeńis golyn 83-minýtta «Atyraý» sapynan Braian jeńis golyn soqty. Osylaisha munaily qalanyń komandasy 2:1 esebimen basym tústi.
Al Almatyda «Qairat» óz alańynda Aqtaýdyń «Kaspii» komandasyn qabyldady. Oiynnyń 6-minýtynda almatylyq Artýr Shýshenachev esep ashty. Odan keiin Vagner Lav 25, 71-minýttarda qos goldyń avtory atansa, «Kaspii» sapynan Rýslan Mingazov esep aiyrmasyn qysqartty. Budan keiin «Qairat» sapynan Kamo Oganesian 83, Gýljigit Alyqulov 90-minýttarda mergendik tanytyp, qorytyndy esepti belgiledi. Nátijesinde almatylyq klýb qarsylasyn 5:1 esebimen tize búktirdi,
«Taraz» óz alańynda Túrkistannyń «Turan» komandasymen sheberlik baiqasty. Oiyn barysynda túrkistandyq Temirlan Ámirov 71-minýtta esep ashsa, tarazdyq Jaqyp Qojamberdi 87-minýtta tarazy basyn teńestirdi. Eki komanda 1:1 esebine qanaǵat bildirdi.
Atalǵan týrdy Qyzylordada jergilikti «Qaisar» men Qostanaidyń «Tobyl» komandalary túiindedi. Bul oiynda aldymen qostanailyq Sergei Malyi 13-minýtta esep ashsa, oǵan «Qaisar» sapynan Iovan Chadjenovich 27-minýtta bir golmen jaýap qaiyrdy. Ekinshi kezeńniń 63-minýtynda Dmitrii Miroshnichenko qaitadan «Tobyldy» alǵa shyǵardy. Al 74-minýtta qostanailyq klýbtan Roman Asrankýlov alań ieleri qaqpasyna taǵy bir gol engizdi. Osylaisha «Tobyl» alań ielerin 3:1 esebimen jeńip, týrnir kestesinde kósh basyna shyqty.
Endi 17-týr oiyndary 27 jáne 28 maýsym kúnderi ótkiziledi.
