Búgin, 18 cáýirde fýtboldan Premer-liga komandalary arasyndaǵy el birinshiliginiń altynshy týrynda úsh oiyn ótti, dep habarlaidy "Ult aqparat".
Alǵashqy oiynda «Taraz» óz alańynda Oraldyń «Aqjaiyq» komandasyn jeńdi. Kezdesý taǵdyryn alań ieleri qatarynan 48-minýtta Pedro Eýjenio soqqan jalǵyz gol sheshti. Osylaisha tarazdyqtar 1:0 esebimen jeńiske jetti. Atalǵan jeńisinen keiin «Taraz» týrnir kestesinde 14 upaimen ekinshi orynǵa kóterildi.
Elordada «Astana» Qyzyljardyń «Qyzyljar» komandasyn 3:1 esebimen tize búktirdi. Kezdesýde elordalyq Abzal Beisebekov 4-minýtta esep ashqan edi. Oǵan qyzyljarlyq komandadan Álibek Qasym 40-minýtta bir golmen jaýap berdi. Odan keiin «Astana» sapynan Marion Tomasov 65, Maks Ebong 67-minýttarda gol soǵyp, qorytyndy esepti belgiledi. Jeńisinen keiin elordalyq klýb týrnir kestesinde kósh basyna shyqty.
Al Qyzylordada jergilikti «Qaisar» men «Atyraý» komandalary 1:1 esebine qanaǵat bildirdi. Bul oiynda alań ielerinen Karolis Laýkjemis 4-minýtta esep ashsa, 83-minýtta atyraýlyq Dmitrii Gýz tarazy basyn teńestirdi.
Atalǵan týrdaǵy qalǵan oiyndar 19 sáýirde ótkiziledi. Bul kúni «Jetisý» men «Ordabasy», «Aqtóbe» men «Shahter», «Qairat» pen «Tobyl», «Turan» men «Kaspii» komandalary kezdesedi.
