فۋتبولدان قازاقستان بٸرٸنشٸلٸگٸ: «استانا» كٶش باسىنا شىقتى

بٷگٸن, 18 cەۋٸردە فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ التىنشى تۋرىندا ٷش ويىن ٶتتٸ, دەپ حابارلايدى "ۇلت اقپارات".

العاشقى ويىندا «تاراز» ٶز الاڭىندا ورالدىڭ «اقجايىق» كومانداسىن جەڭدٸ. كەزدەسۋ تاعدىرىن الاڭ يەلەرٸ قاتارىنان 48-مينۋتتا پەدرو ەۋجەنيو سوققان جالعىز گول شەشتٸ. وسىلايشا تارازدىقتار 1:0 ەسەبٸمەن جەڭٸسكە جەتتٸ. اتالعان جەڭٸسٸنەن كەيٸن «تاراز» تۋرنير كەستەسٸندە 14 ۇپايمەن ەكٸنشٸ ورىنعا كٶتەرٸلدٸ. 

ەلوردادا «استانا» قىزىلجاردىڭ «قىزىلجار» كومانداسىن 3:1 ەسەبٸمەن تٸزە بٷكتٸردٸ. كەزدەسۋدە ەلوردالىق ابزال بەيسەبەكوۆ 4-مينۋتتا ەسەپ اشقان ەدٸ. وعان قىزىلجارلىق كوماندادان ەلٸبەك قاسىم 40-مينۋتتا بٸر گولمەن جاۋاپ بەردٸ. ودان كەيٸن «استانا» ساپىنان ماريون توماسوۆ 65, ماكس ەبونگ 67-مينۋتتاردا گول سوعىپ, قورىتىندى ەسەپتٸ بەلگٸلەدٸ. جەڭٸسٸنەن كەيٸن ەلوردالىق كلۋب تۋرنير كەستەسٸندە كٶش باسىنا شىقتى. 

ال قىزىلوردادا جەرگٸلٸكتٸ «قايسار» مەن «اتىراۋ» كوماندالارى 1:1 ەسەبٸنە قاناعات بٸلدٸردٸ. بۇل ويىندا الاڭ يەلەرٸنەن كاروليس لاۋكجەميس 4-مينۋتتا ەسەپ اشسا, 83-مينۋتتا اتىراۋلىق دميتريي گۋز تارازى باسىن تەڭەستٸردٸ. 

اتالعان تۋرداعى قالعان ويىندار 19 سەۋٸردە ٶتكٸزٸلەدٸ. بۇل كٷنٸ «جەتٸسۋ» مەن «ورداباسى», «اقتٶبە» مەن «شاحتەر», «قايرات» پەن «توبىل», «تۇران» مەن «كاسپيي» كوماندالارى كەزدەسەدٸ.