Fýtboldan Frantsiia quramasy 2022 jylǵy álem chempionatyna irikteý satysyndaǵy Qazaqstanmen kezdesýine qatysatyn oiynshylar tizimin jariialady, dep habarlaidy "Ult aqparat".
Bul tizimde Angliianyń «Chelsi» klýbynyń jartylai qorǵaýshysy Ngolo Kante joq. Ol quramanyń óz alańyndaǵy Ýkrainamen kezdesýinde jaraqat alyp qalǵan.
Tizimde esimi álemge áigili fýtbolshylardyń barlyǵy qamtylǵan.
Atap aitqanda, olardyń qatarynda belgili klýbtardyń namysyn qorǵaityn qaqpashy Ýgo Loris, jartylai qorǵaýshylar Pol Pogba, Ýsman Dembele, shabýylshylar Kilian Mbappe, Olive Jirý, Antýan Grizmann bar.
Frantsiia quramasynyń tolyq tizimi:
Qaqpashylar: Maik Menian («Lill»), Ýgo Loris («Tottenhem»), Stiv Mandanda («Marsel»), Alfons Areolia («Fýlhem»).
Qorǵaýshylar: Ferlan Mendi («Real»), Liýka Din («Everton»), Presnel Kimpembe (PSJ), Leo Diýbýa («Lion»), Kleman Langle («Barselona»), Liýka Ernandes («Bavariia»), Kýrt Zýma («Chelsi»), Rafael Varan («Real»), Benjamen Pavar («Bavariia»).
Jartyai qorǵaýshylar: Pol Pogba («Manchester Iýnaited»), Ýsman Dembele («Barselona»), Adrien Rabo («Iýventýs»), Mýssa Sissoko («Tottenhem»), Toma Lemar («Atletiko»), Tangi Ndombele («Tottenhem»), Kingsli Koman («Bavariia»).
Shabýylshylar: Kilian Mbappe (PSJ), Antýan Grizmann («Barselona»), Olive Jirý («Chelsi»), Antoni Marsial («Manchester Iýnaited»), Vissam Ben-Iedder («Monako»).
Esterińizge sala keteiik, Qazaqstan atalǵan dop dodasynyń irikteý satysynda D tobynda synǵa túsedi.
Qarsylastary - Frantsiia, Ýkraina, Bosniia jáne Gertsogovina, Finliandiia quramalary.
Qazaqstandyq fýtbolshylar alǵashqy týrda eshkimmen kezdesken joq. Óz alańynda Frantsiia Ýkrainamen 1:1, Finliandiia Bosniia jáne Gertsogovinamen 2:2 esebimen teń oinady.
Endi 28 naýryzda Qazaqstan men Frantsiia kezdesse, sol kúni Ýkraina Finliandiiamen sheberlik baiqasady.
Eýropa qurlyǵynda 55 qurama 11 topqa bólingen. Árbir topta alǵashqy eki orynǵa ie bolǵan quramalar álem chempionatynyń finaldyq satysyna tikelei joldama alady.
Irikteý kezeńi biylǵy jyldyń 16 qarashasynda márege jetedi.
Dúbirli dodanyń finaldyq satysy 2022 jyldyń 21 qarashasy men 18 jeltoqsany aralyǵynda Katarda ótedi.
