Biyl fýtboldan Premer-liga komandalary arasyndaǵy el birinshiligine 14 komanda qatysatyn boldy, dep habarlaidy "Ult aqparat" Qazaqstan fýtbol federatsiiasyna silteme jasap.
Bul sheshim búgin ótken Qazaqstan fýtbol federatsiiasy atqarý komitetiniń otyrysynda qabyldandy. Byltyr Premer-liga komandalary arasyndaǵy el birinshiliginde alǵashqy týrlarda 12 komanda qatysqan bolatyn. Sál keiinirek qarjy máselesine bailanysty Pavlodardyń «Ertisi» jarysty jalǵastyrýdan bas tartty. Nátijesinde el birinshiliginde 11 komanda synǵa tústi. Olardyń arasynan sońǵy oryndy mise tutqan Kókshetaýdyń «Oqjetpesi» birinshi ligaǵa túsip qaldy. Birinshi ligada eki konferentsiiada jeńimpaz atanǵan «Aqtóbe» men «Atyraý» komandalary úzdikter qataryna qosyldy.
Biyl Premer-ligada baq synaityn qalǵan eki komanda ázirge belgisiz. Sarapshylar buǵan Oraldyń «Aqjaiyq» jáne Túrkistan oblysynyń «Arys» komandalary qol jetkizýi múmkin ekenin aitady.
Sondai-aq, atalǵan shara barysynda qysqy transferlik merzimniń ýaqyty belgilendi. Komandalar 25 qańtar men 17 sáýir aralyǵynda jańa oiynshylardy tirkei alady.
