Aǵylshyn fýtbol klýbtary – «Manchester Iýnaited» jáne «Liverpýl» arasyndaǵy josparlanǵan match bolmai qaldy. Oǵan Manchesterdegi «Old Trafford» stadionyna 200-ge jýyq jankúier basyp kirip, klýb ieleri – amerikalyq Gleizer otbasyna narazylyǵyn bildirýi sebep boldy, dep habarlaidy BBC.
Match 2 mamyr, jeksenbi kúni britaniialyq ýaqyt boiynsha saǵat 16:30 bastalýy kerek edi. Matchtyń endigi ótetin kúni áli anyqtalmady. Klýbtar arasynda kelissózder júredi.
Angliia Premer-ligasynyń ókili matchtyń keiinge aýystyrylýyn «politsiianyń, eki klýbtyń jáne Premer-Liganyń birlesken sheshimi» boldy dep málimdedi.
Bul Premer-liga matchynyń alǵash ret bolmai qalýy. Ótken aida «Manchester Iýnaited» ieleri Eýropalyq Sýper ligaǵa qosylýǵa tyrysty, alaida jankúierlerdiń jappai narazylyǵynan keiin olar bul oidan bas tartty.
Karantin shekteýlerin qatań saqtap, MIý men Liverpýl oiyny da bos stadionda ótýi kerek edi. Alaida júzdegen jankúier alańǵa kirip ketken. Politsiia olardy qýyp jiberdi, biraq arada azdaǵan ýaqyt ótkende olardyń keibireýleri alańǵa qaita júgirip shyqqan.
«Manchester Iýnaited» pen «Liverpýl» oiynshylary tártipsizdik bastalǵan kezde stadionǵa qonaq úilerinen áli shyǵyp úlgermegen.
«Bizdiń ustanymymyz – oiyndy ótkizý nemese ótkizbeý týraly sheshim qabyldaǵan kezde qoǵamdyq qaýipsizdik birinshi orynda bolýy kerek. Stadionnyń qatysýshylary da, qyzmetkerleri de, basqa da resmi tulǵalar tolyq qaýipsizdikte bolýy kerek. Ókinishke orai, oǵan kepildik berý múmkin bolmady», – delingen klýbtyń resmi málimdemesinde.
