Fýtboldan Almatynyń «Qairat» komandasy quramyna reseilik jartylai qorǵaýshy Kirill Kolesnichenko qosyldy, dep habarlaidy "Ult aqparat" komanda saityna silteme jasap.
Kirill Kolesnichenko 2000 jyldyń 31 qańtarynda Reseidiń Volgograd oblysynyń Kamyshin qalasynda dúniege kelgen. On bir jasynan Máskeýdegi «Chertanovo» fýtbol mektebinde tálim aldy. On bes jasynda Reseidiń kásipqoi fýtbol ligasynda alǵashqy oiynyn ótkizdi. Osylaisha Reseide kásibi deńgeide oinap júrgen jas fýtbolshy atandy. 2015 jyly Reseidiń 16 jasqa deiingi quramasyna shaqyrtý aldy. Sol eldiń Premer-ligasyndaǵy alǵashqy oiynyn 2018 jyly Habarosvk qalasynyń «SKA-Habarovsk» komandasynda ótkizdi. Odan keiin qaitadan «Chertanovo» klýbyna oralyp, onda 30 oiynda 6 gol soǵyp, 3 nátijeli pas berdi.
«Qairat» komandasynyń basshylyǵy Kirill Kolesnichenkomen úsh jylǵa kelisim-shartqa otyrdy.
Qazaqstan Premer-ligasynyń transferlik merzimi 3 sáýirge deiin sozylady.
