Búgin fýtboldan Premer-liga komandalary arasyndaǵy Qazaqstan birinshiliginiń ekinshi týry bastaldy, dep habarlaidy "Ult aqparat".
Komandalar 19 jáne 20 naýryz kúnderi ózara sheberlik baiqasady. Alǵashqy kúnde úsh oiyn ótse, kelesi kúnge tórt kezdesý belgilengen.
Ázirge eki oiynnyń nátijesi belgili boldy. Alǵashqysynda «Taraz» óz alańynda «Qyzyljar» komandasyn qabyldasa, ekinshi oiynda Qyzylordada «Qaisar» Almatynyń «Qairatymen» sheberlik baiqasty.
«Taraz» jáne «Qyzyljar» arasyndaǵy kezdesýinde esep ashylǵan joq. Komandalar 0:0 esebine qanaǵat bildirip tarasty.
«Qaisar» men «Qairat» arasyndaǵy oiyn. Ótken jylǵy el chempiony tizgindi óz qolyna alýǵa tyrysty. Oǵan alań ieleri birinshi kezeńde laiyqty qarsylyq kórsetti. Degenmen 45-minýtta almatylyq klýb shabýylshysy Vagner Lav esep ashyp ketti.
Ekinshi kezeńde Kamo Oganesian 62, Daniiar Úsenov 77-minýttarda mergendik tanytty. Oiynda almatylyq klýb 3:0 esebimen jeńiske jetti.
Sondai-aq, búgin elordalyq «Astana» óz alańynda Aqtaýdyń «Kaspii» klýbymen jasyl alańǵa shyǵady. Oiyn jergilikti ýaqytpen 18.00-de bastalyp, «Qazsport» telearnasynan tikelei efirde kórsetiledi.
Al 20 naýryzda «Jetisý» (Taldyqorǵan) men «Turan» (Túrkistan), «Aqjaiyq» (Oral) men «Atyraý», «Shahter» (Qaraǵandy) men «Ordabasy» (Shymkent), «Aqtóbe» men «Tobyl» (Qostanai) komandalary kezdesedi.
