بٷگٸن فۋتبولدان پرەمەر-ليگا كوماندالارى اراسىنداعى قازاقستان بٸرٸنشٸلٸگٸنٸڭ ەكٸنشٸ تۋرى باستالدى, دەپ حابارلايدى "ۇلت اقپارات".
كوماندالار 19 جەنە 20 ناۋرىز كٷندەرٸ ٶزارا شەبەرلٸك بايقاسادى. العاشقى كٷندە ٷش ويىن ٶتسە, كەلەسٸ كٷنگە تٶرت كەزدەسۋ بەلگٸلەنگەن.
ەزٸرگە ەكٸ ويىننىڭ نەتيجەسٸ بەلگٸلٸ بولدى. العاشقىسىندا «تاراز» ٶز الاڭىندا «قىزىلجار» كومانداسىن قابىلداسا, ەكٸنشٸ ويىندا قىزىلوردادا «قايسار» الماتىنىڭ «قايراتىمەن» شەبەرلٸك بايقاستى.
«تاراز» جەنە «قىزىلجار» اراسىنداعى كەزدەسۋٸندە ەسەپ اشىلعان جوق. كوماندالار 0:0 ەسەبٸنە قاناعات بٸلدٸرٸپ تاراستى.
«قايسار» مەن «قايرات» اراسىنداعى ويىن. ٶتكەن جىلعى ەل چەمپيونى تٸزگٸندٸ ٶز قولىنا الۋعا تىرىستى. وعان الاڭ يەلەرٸ بٸرٸنشٸ كەزەڭدە لايىقتى قارسىلىق كٶرسەتتٸ. دەگەنمەن 45-مينۋتتا الماتىلىق كلۋب شابۋىلشىسى ۆاگنەر لاۆ ەسەپ اشىپ كەتتٸ.
ەكٸنشٸ كەزەڭدە كامو وگانەسيان 62, دانييار ٷسەنوۆ 77-مينۋتتاردا مەرگەندٸك تانىتتى. ويىندا الماتىلىق كلۋب 3:0 ەسەبٸمەن جەڭٸسكە جەتتٸ.
سونداي-اق, بٷگٸن ەلوردالىق «استانا» ٶز الاڭىندا اقتاۋدىڭ «كاسپيي» كلۋبىمەن جاسىل الاڭعا شىعادى. ويىن جەرگٸلٸكتٸ ۋاقىتپەن 18.00-دە باستالىپ, «Qazsport» تەلەارناسىنان تٸكەلەي ەفيردە كٶرسەتٸلەدٸ.
ال 20 ناۋرىزدا «جەتٸسۋ» (تالدىقورعان) مەن «تۇران» (تٷركٸستان), «اقجايىق» (ورال) مەن «اتىراۋ», «شاحتەر» (قاراعاندى) مەن «ورداباسى» (شىمكەنت), «اقتٶبە» مەن «توبىل» (قوستاناي) كوماندالارى كەزدەسەدٸ.
