Búgin fýtboldan Premer-liga komandalary arasyndaǵy Qazaqstan birinshiliginiń ekinshi týry bastalady, dep habarlaidy "Ult aqparat".
Komandalar 19 jáne 20 naýryz kúnderi ózara sheberlik baiqasady. Alǵashqy kúnde úsh oiyn ótse, kelesi kúnge tórt kezdesý belgilengen.
Ekinshi týr elorda ýaqytymen 14.00-de «Taraz» jáne «Qyzyljar» komandalary arasyndaǵy kezdesýmen jalaýyn kóteredi.
Tarazdyq fýtbolshylar birinshi týrda syrt alańda Qyzylordanyń «Qaisaryn» 3:2 esebimen jeńip ketken edi. Al «Qyzyljar» Shymkentte «Ordabasymen» kezdesýi tiis bolatyn. Aýa raiynyń qolaisyzdyǵynan atalǵan kezdesý keiinge shegerildi.
Almatynyń «Qairaty» Qyzylordada jergilikti «Qaisarmen» jasyl alańǵa shyǵady. Ótken týrda óz alańynda almatylyq ujym Taldyqorǵannyń «Jetisýyn» 2:0 esebimen tize búktirdi. Kezdesý elorda ýaqytymen 16.00-de bastalady.
Elordalyq «Astana» óz alańynda jergilikti ýaqytpen 18.00-de Aqtaýdyń «Kaspii» klýbymen jasyl alańǵa shyǵady. «Astana» alǵashqy týrda Túrkistanda «Turanmen» 2:2, «Kaspii» óz alańynda «Aqtóbemen» 1:1 esebimen teń tústi.
Búgingi oiyndardyń barlyǵy «Qazsport» telearnasynan tikelei efirde kórsetiledi.
Al 20 naýryzda «Jetisý» (Taldyqorǵan) men «Turan» (Túrkistan), «Aqjaiyq» (Oral) men «Atyraý», «Shahter» (Qaraǵandy) men «Ordabasy» (Shymkent), «Aqtóbe» men «Tobyl» (Qostanai) komandalary kezdesedi.
