Búgin fýtboldan Premer-liga komandalary arasyndaǵy Qazaqstan birinshiliginiń ekinshi týrynda elordalyq «Astana» óz alańynda Aqtaýdyń «Kaspii» klýbyn qabyldady, dep habarlaidy "Ult aqparat".
Ótken týrda «Astana» Túrkistanda «Turanmen» 2:2, «Kaspii» óz alańynda «Aqtóbemen» 1:1 esebimen teń túsken bolatyn.
Búgingi kezdesýde elordalyq klýb jeńiske jetýge bar kúshin saldy. Oiyn basynan qarsylas komanda qaqpasy mańynda jii boi kórsetti. Nátijesinde 17-minýtta Maks Ebong mergendigimen kózge tústi. Al 46-minýtta Marin Tomasov penaltiden múlt ketken joq.
Kezdesýde «Astana» qarsylasyn 2:0 esebimen tize búktirdi. Atalǵan jeńisinen keiin elordalyq klýb týrnir kestesinde ekinshi orynǵa kóterildi.
Sondai-aq, búgin ekinshi týrda taǵy eki oiyn ótti. Óz alańynda «Taraz» Petropavldyń «Qyzyljarymen» 0:0 esebimen teń tússe, Qyzylordanyń «Qaisary» Almatynyń «Qairatyna» 0:3 esebimen jeńilip qaldy.
Endi 20 naýryzda 14.00-de «Jetisý» (Taldyqorǵan) men «Turan» (Túrkistan), 16.00-de «Aqjaiyq» (Oral) men «Atyraý», «Shahter» (Qaraǵandy) men «Ordabasy» (Shymkent), 19.00-de «Aqtóbe» men «Tobyl» (Qostanai) komandalary kezdesedi.
