Fýtboldan Qazaqstan chempionaty besinshi týrynyń alǵashqy eki oiyny ótti, dep habarlaidy "Ult aqparat".
Aldymen Petropavl qalasynda jergilikti «Qyzyljar» «Aqtóbe» komandasyn qabyldady.
Osyǵan deiin jeńilip kórmegen alań ieleri birinshi bolyp esep ashty. Shabýylǵa qosylǵan belorýs qorǵaýshysy Valerii Karshakevich 66-minýtta mergendik tanytty.
Degenmen aqtóbelikter oiynǵa tyńnan qosylǵan fýtbolshylardyń kómegimen match sońynda jeńisti julyp aldy. Aldymen 90-minýtta Didar Jalmuqan tarazy basyn
teńestirdi. Al 93-minýtta Rifat Nýrmýgamet esepti 2:1-ge jetkizdi.
Al ótken týrda «Tarazdan» 0:4 esebimen oisyrai utylǵannan keiin «Shahterdiń» bas bapkeri Ali Aliev ornynan ketip, ýaqytsha jattyqtyrýshy mindetin ataqty fýtbolshy Andrei Finonchenko qolǵa alǵan bolatyn.
Óz alańy jaramsyz bolǵandyqtan, qaraǵandylyq klýb pen «Aqjaiyqtyń» matchy elordadaǵy «Astana Arena» stadionynda ótti.
Kezdesý qaraǵandylyqtar úshin sátsiz bastaldy.
«Aqjaiyqtyń» shabýylshysy Viacheslav Shvyrevpen soqtyǵysyp qalǵan «Shahterdiń» qaqpashysy Igor Shatskii jaraqat alyp, ornyna Timýrbek Zákirov shyqty.
Birinshi taim sońyna qarai, 39-minýtta qarsy shabýyl kezinde reseilik Evgenii Kozlovtyń T.Zákirovten asyra salǵan dobyn ganalyq qorǵaýshy Gideon Baa óz qaqpasyna toǵytty. Degenmen 44-minýtta Aidos Táttibaev qarymta gol soqty – 1:1.
Ekinshi taimda 73-minýtta qonaqtar aiyp dobyn oryndady.
Osy sátte taǵy bir qaraǵandylyq qorǵaýshy David Atanaskoski óz qaqpasyna gol soǵyp aldy.
Sóitip sáttilik serik bolǵan «Aqjaiyq» 2:1 esebimen jeńiske jetti.
Budan keiin aqtóbelikter 9 upaimen týrnir kestesinde ekinshi, oraldyqtar segizinshi orynǵa kóterildi.
18 sáýir kúni ótetin altynshy týrda «Aqtóbe» «Shahterdi» qabyldasa, «Aqjaiyq» syrt alańda «Tarazben» oinaidy.
